Comunidad awo por disfruta di outdoor gym renoba na Linear Park

Minister Wendrick Cicilia ta inverti den salud y bienestar

ORANJESTAD (AAN): Minister di Turismo, Transporte y Labor, mr. Wendrick Cicilia, a presenta e renobacion di e area di ehercicio na Linear Park. Durante e momento cu prensa, e tabata acompaña pa consehero Sonaly Fernandez-Acosta y Parlamentario Dennerich Kelly, kende a enfatisa e importancia di sigui inverti den espacionan publico cu ta beneficia directamente nos comunidad.

Gobierno ta sigui comprometi cu inverti den bario y den proyectonan cu tin un impacto directo riba calidad di bida di pueblo. Dentro di e recurso financiero cu cada ministerio tin disponibel, Ministerio di Turismo, Transporte y Labor a logra responde na un necesidad cu e comunidad mes a identifica.

"Como Minister, mi ta kere cu bo mester tene bo horea cerca di e comunidad. Durante diferente bishita y combersacionnan cu residente y usuario di Linear Park, nan a comparti nan preocupacion cu e mashinnan di ehercicio tabata den mal estado y cu pa hopi aña no a haya e atencion necesario. Awe nos a cumpli cu e compromiso pa mehora e situacion," Minister Cicilia a expresa.

Como parti di e renobacion, tres di e mashinnan existente a haya mantencion completo, mientras cu a instala cuater mashin completamente nobo pa amplia e facilidad. E mashinnan nobo ta inclui ekipo pa train cu peso, dunando nos localnan y bishitante mas opcion pa haci actividad fisico den un ambiente publico, moderno y accesibel.

"E inversion aki no ta solamente den ekipo. Ta un inversion den salud, bienestar y calidad di bida di nos comunidad. Nos kier pa tur persona cu ta cana, core of bishita Linear Park por tin acceso na un espacio unda nan por move, haci ehercicio y disfruta di un estilo di bida activo," Minister Cicilia a continua bisando.

Cu e renobacion aki, Linear Park awo ta conta cu un outdoor gym moderno y funcional, cu ta responde n’e necesidadnan cu e comunidad mes a expresa y cu ta crea mas oportunidad pa henter comunidad haci uzo di un espacio publico pa mantene un bida activo y saludabel.

Minister Cicilia a enfatisa cu e proyecto aki ta un ehempel di con Gobierno por uza e recurso financiero disponibel pa responde n’e preocupacionnan real di ciudadano, invertiendo den proyectonan cu tin un beneficio directo pa comunidad y cu fortalece e calidad di bida di pueblo.