Morto inespera riba Diamars di ex-Parlamentario Melvin Tromp di AVP

ORANJESTAD (AAN): Riba Diamars merdia e noticia tristo a drenta, cu e conocido ex-Parlamentario y Politico di AVP, esta Melvin Tromp a fayece debi na su malesa na Medellin, Colombia.

     Melvin Atanacio Tromp a nace na Aruba dia 2 di Mei 1960, pues tin 62 aña di edad.  E tabata conoci como un persona cu a traha duro riba tereno di refineria na San Nicolas.  Pero el a demostra semper compasion y deseo di subi lista di Partido AVP.

   Y esey ta algo cu el a haci 17 aña pasa, ora cu na Eleccion 2005 el a bay eleccion pa prome biaha riba e lista di Partido berde.

   Atravez di añanan el a sa di drenta Parlamento di Aruba unda semper e tabata trece su estilo cu a capta atencion di tur hende.  Esaki a inclui e ocasional conflicto cu demas Parlamentarionan.

   Den e ultimo eleccion, Melvin a keda for di Parlamento pero toch a keda constant den noticia, door di emiti su boletinnan riba observacionnan cu e tabata sigui haci.

   A bin compronde cu e estado di salud di Tromp a tuma un rumbo preocupante ultimo temponan, unda a bin constata cu e tin cancer di tripa.

   Cu e diagnostico aki, el a opta pa subi avion y bay Medellin pa asina haya examinacion mas profundo di Docternan Colombiano.  Djis pa mira kico otro rumbo por tuma den e tratamentonan.

   Pero pa sorpresa, riba Diamars merdia a bin haye sin ta duna señal di bida riba cama.  Docter por a haci nada mas sino constata morto.

   Esaki a yega manera un shock inmenso pa su famia, su yiunan, su coleganan di Partido, y su votadornan.  Melvin Tromp tabata un politico cu semper ta saluda tur hende ora cu e topa ciudadanonan riba caminda, of na eventonan publico.  E ta hopi social den e banda ey y semper tabata cla pa scucha tur preocupacion cu un persona lo por tin.

   Na su coleganan di Partido, demas famia, su yiunan, y amigonan, DIARIO ta extende su mas profundo palabranan di condolencia.