Volodymyr Zelenski ta hiba mundo na realidad moral
- Posicion di DIARIO den relacionnan mundial afirma
- Weganan Olimpico por uni hende den matanza cruel?
ORANJESTAD (AAN)- Durante e guera sangriente na Ukraine, mundo a wordo presenta cu un realidad grandi cu na diferente occasion DIARIO a trece dilanti.
Den varios desaroyo mundial, DIARIO a lansa e pregunta kico ta permisibel a base di un moral sano den e mundo actual, cu for di Segundo Guera Mundial ta trata na yega na un paz forzoso, cu continuamente ta wordo kibra dor di lidernan cu ta mata y destrui pa nan keda na poder.
Na diferente ocasion DIARIO a presenta Nacionnan Uni como forum mundial cu mester uni pero ta incapaz pa haci husticia y trece paz, manera ta keda proba atrobe na Ukraine caminda un Pueblo ta wordo masacra dor di un dirigente Ruso dirigi dor di hamber pa poder.
Awe e lider di Ukraine, Zelensky, ta bolbe hiba mundo na e centro di moral, cu mester ta central den tur esfuerzo pa alcansa paz, sin destrui e normanan sano di moral.
Zelensky a anuncia cu mundo liber, cu ta presenta su mes como democratico, no por permiti Rusia participa na weganan Olimpico. El a indica cu no por ta posibel cu den e guera actual, ta permiti atletanan carga e bandera di e pais, cu na e momentonan aki ta destrui otro pais y bida humano.
Zelensky a presenta como ehempel loke a pasa na Weganan Olimpico na 1936 ora Nazi a haya oportunidad pa uza e Weganan Olimpico pa entrega mundo un cara falso di loke tabata sconde tras di e imagen di Nazi, cu a bira horor historico.
Zelensky atrobe ta pone mundo contra muraya cu su posicion abierto, cu ta mishi directamente cu e moral mundial, pa ta “imparcial” aunke imparcialidad ta uno di e trampanan mas grandi di cobardia y motibo di tanto desgracia humano.
Imparcialidad ta haci cu te awe Nacionnan Uni no por expresa nan man mes contra e horor na Ukraine, caminda inocente ta muri.
Paisnan liber ta entrega arma na Ukraine pa defende su mes, ta tuma medida economico contra Rusia, pero ta nenga di rechasa e bandera Ruso na Weganan Olimpico, pasobra tur hende mester por participa na e weganan.
Ukraine no ta un pais desconoci den historia di Weganan Olimpico caminda el a destaca na diferente momento.
Na e momentonan aki, sinembargo, no ta importante cual atleta tin e prestacionnan mas halto.
Na e momentonan aki ta importante pa sancionnan mundial expresa nan mes caminda nan tin balor.
Na varios occasion DIARIO a mustra cu ta imposibel pa admiti exposicion di dictadornan na encuentronan na Nacionnan Uni cu ta manca pa e realidad, cu dictadornan y regimennan cruel, tin mes boz cu e Pueblonan cu ta sufri.
Awe un posicion di DIARIO ta topa cu afirmacion di un lider, di Zelensky cu mundo liber ta aplaudi.
Awor e pregunta ta keda, con mundo liber por permiti pa e atletanan di Zelensky y di paisnan liber, cu ta sostene Zelenski, cana cu e bandera di Rusia, e bandera di Putin, cu ta entrega mundo e imagen di Hitler, di Nero, di tanto dictador ainda na mando na nan pais, cu sosten di Nacionnan Uni, caminda porta pa husticia ta keda cera pa e miedo di haci husticia cu na final lo vence!
