Minister Gerlien Croes ta tuma paso importante pa sigura mantencion di e instalacionnan deportivo

ORANJESTAD (AAN):  Minister di Deporte, Gerlien Croes, a tene un reunion cu Departamento di Obranan Publico (DOW) pa

inicia e desaroyo di un plan di mantencion pa tur instalacion deportivo publico na Aruba.

            Crea y ehecuta e plan di mantencion aki lo ta un paso importante den e vision y compromiso di e minister pa transparencia, integridad financiero, innovacion y sostenibilidad den e sector deportivo. Durante añanan anterior, hopi di e instalacionnan deportivo a padece di falta di mantencion structural, un situacion cu e minister ta determina pa mehora.

            "Nos ta kere cu no ta suficiente pa construi instalacionnan nobo; nos mester cuida e infrastructura cu ya nos tin", Minister Croes a bisa. "E atletanan, hobennan y comunidad merece espacionan deportivo cu ta adecua, sigur, limpi y funcional na tur momento. E gobierno actual ta compromete pa traha cu responsabilidad y vision pa logra esaki".

            E colaboracion cu DOW/Ministerio di Insfrastructura lo enfoca riba evalua e condicion actual di cada instalacion, identifica necesidadnan cu tin prioridad, y establece un programa di mantencion structural. E meta ta pa preserva e infrastructura existente y extende e duracion y impacto di e inversionnan publico den deporte.

            E iniciativa ta parti di un esfuerso mas grandi pa profesionalisa e maneho di deporte y facilidadnan deportivo publico y pa sigura cu cada florin di fondonan publico ta wordo inverti cu proposito y responsabilidad.

            Cu e enfoke proactivo aki, Minister Croes ta tuma paso concreto pa crea un futuro den cual e ciudadano- y atletanan di Aruba por desaroya y prospera den instalacionnan di nivel cu ta refleha e orguyo di un nacion cu ta kere den e poder di deporte.