Mitar di caminda aki di Rooi Afo lo wordo cera entrante awe

No por core bay nort riba dje mas

• Suplica pa Trucknan pisa no cruza riba dje tampoco 

ORANJESTAD (AAN): Por lo pronto mitar di e caminda cu ta pasa riba e Dam di Rooi Afo, lo bay ta cera!  Esey ta decision cu Departamento di DOW a tuma.

   Departamento di Obra Publico a confirma cu riba e brug bo por pasa bay zuid so, y e parti di bay nort lo ta cera.

   Esaki lo cuminza entrante awe Dialuna 10 di Februari 2025. Pues awe Dialuna lo cera e caminda direccion panort di Rooi Afo pa Paradera.  E caminda direccion pazuid di Paradera pa Rooi Afo si lo keda habri pa automobilistanan.

   DOW a splica cu e motibo di e ciere akinan ta cu e caminda tin mas di 50 aña di existencia y e ‘talud’ a cuminsa kibra, haciendo cu e caminda a haya “craquele” (cuero di crocodil).

   Expertonan di DOW aworaki ta den deliberacion cua opcion lo ta mihor y mas eficiente pa haci reparacion, pero nan por garantisa si cu e proyecto lo wordo drecha e aña aki mes.

   Suplica na trucks: Un peticion si cu DOW tin na dirigi na tur e operadornan di Heavy Equipment pa por fabor no pasa riba e caminda akinan te proximo aviso.  Pues di e banda bay zuid cu ta keda habri.

  DOW a bisa cu trafico di cu ta bayendo panort, lo nota cu e ruta di desviacion lo wordo indica cu borchi cu baricada di aviso y nan ta pidi automobilistanan pa cooperacion durante e cierre di e caminda aki.