Resultado di cumbre di diferente Ombudsman di Reino
ORANJESTAD (AAN): Manera por corda, tabata dianan 13, 14 y 15 di Januari a tuma lugar e encuentro anual di e Ombudsmannen di Reino aki na Aruba. Esaki tawata un encuentro historico pasobra ta pa prome biaha cu Aruba a participa na esaki y e prome Ombudsman di Aruba, sra. Jurima Bryson tawata anfitrion di e encuentro importante.
Curaçao, St. Maarten y Hulanda tin nan Ombudsmannen caba ya pa casi 10 aña. Dia 1 di october 2024 sra. Jurima Bryson a huramenta como e prome Ombudsman di Aruba y cu esaki tur pais den Reino tin un Ombudsman. E grupo di Ombudsmannen ta completo.
Den e fase actual di formacion di e Instituto di Ombudsman di Aruba, sra. Jurima Bryson por conta riba ayudo y sosten di su coleganan sr. Reinier van Zutphen, Ombudsman Nacional, sr. Keursly Concincion, Ombudsman di Curaçao y sra. Gwendolien Mossel, Ombudsman di Sint Maarten.
Con e apoyo aki pa sra. Jurima Bryson lo tuma lugar y lo haya forma tawata entre otro e puntonan riba agenda di e encuentro anual. Otro puntonan cu a wordo trata ta temanan manera inmigracion, derecho di mucha y extension di servicio di Ombudsman di Mucha. E Ombudsmannen tambe a papia tocante derecho di tin acceso na awa limpi. Den cuadro di esaki Ombudsmannen a pone atencion special na e derecho pa tin acceso na awa limpi pasobra esaki mester di atencion urgente na e islanan. No ta permiti pa casnan caminda tin mucha keda sin awa
Na maart 2024 Corte di Apelacion di Den Haag a duna un sentencia hopi importante pa loke ta trata e derecho di awa limpi pa casnan di cual menornan di edad ta forma parti di dje. Corte a determina cu tanto Estado Hulandes como e proveedornan di awa a actua den forma ‘onrechtmatig’, pues contra ley contra e muchanan na momento a corta awa pa motibo cu no a haya pago. E proveedornan di awa a wordo duna un ordo pa reestablece awa of soru pa e casnan haya e cantidad di awa estableci segun normanan di World Health Organisation te na momento cu awa wordo conecta bek.
Na e islanan sinembargo te cu awo awa ta wordo corta na momento cu no haya pago sin cu ta tene cuenta si na e adres ey tin mucha ta biba.
E Ombudsmannen lo keda enfoca den 2025 riba e puntonan aki.
Ta remarcabel con e legislacion di Ombudsman Aruba, e Landsverordening Ombudsman, ta esun mas avanza den Reino. E Ombudsman di Aruba tin e autoridad unico di por investiga no solamente un instituto di gobierno of entidad publico, pero tambe institutonan cu nan operacion - direct of indirect - ta un extension di e servicio di gobierno y e pueblo di Aruba ta depende di e institutonan aki. P’esey tambe lo organisa encuentro informativo pa e organisacionnan cu mester ta na altura di e legislacion di Ombudsman di Aruba cu e meta pa informa di e rol y autoridad di Ombudsman na e organisacionnan cu ta cai bou di e hurisdiccion di e ley aki. Oficina di Ombudsman Aruba kier informa cu nan lo mantene pueblo na altura di e ultimo desaroyonan y encuanto e apertura oficial di oficina. Pa por keda na altura di e ultimo desaroyonan, por bishita tambe e paginanan di Facebook ‘Ombudsman Aruba’, Instagram ‘ombudsmanaruba’ y LinkedIn ‘Ombudsman Aruba’.
