Ministro Xiomara Maduro a bishita Colegio San Hose y Scol Soeur Juliette

ORANJESTAD (AAN): Finalisando e bishitanan escolar en conexion cu Dia di Betico,

Minister Xiomara Maduro encarga cu Cultura, a bishita Colegio San Hose y Scol Soeur Juliette pa asina combersa cu e muchanan riba e celebracion aki.

   Riba e prome bishita di e mainta aki na Colegio San Hose, e mandatario a worde ricibi cu alegria pa tur e alumnonan y nan maestronan cu a sali pa dune un caluroso bonbini. Despues di esaki, Minister Maduro a bishita klas 6 pa asina combersa cu e muchanan riba Dia di Betico, pa splicanan e importancia di e logronan di Betico pero tambe pa inspiranan pa sigui studia y persigui nan aspiracionnan. Usando Betico como ehempel, e mandatario a inspira e muchanan pa semper kere den nan mes y tambe bay pa locual cu nan kier logra. E mandatario a finalisa e bishita hungando un wega cu e muchanan cu tabata tin Dia di Betico como tema.

   E mainta a finalisa na Scol Soeur Juliette unda cu Minister Maduro a haya e oportunidad pa cuminda e alumnonan di e scol aki y tambe combersa cu nan riba Dia di Betico y kico e dia aki ta nifica pa nos. Mester menciona cu e muchanan tabata sumamente contento cu e bishita di e mandatario y comparti cune con nan lo bay celebra e dia aki.

   Minister Maduro ta gradici e cabesante y maestronan di Colegio San Hose y Scol Souer Juliette pa a ricibi'e y permiti'e comparti un rato ameno cu tur e muchanan y tambe di por a contanan un tiki mas di e celebracion di Dia di Betico. E mandatario a invita e muchanan y nan mayornan pa celebra e dia aki y asina hunto biba nos cultura.