City Inspector contento cu pueblo ta uza saconan cu ta wordo parti durante Carnaval

Robby Rosel vocero di Bureau City Inspector:

ORANJESTAD (AAN) – Robby Rosel, Vocero di Bureau City Inspector, a bisa cu si mira riba e ruta di Vondellaan, cu ta tuma e banco di Caribe te na final di e caya aki, tin bastante palet y esaki ta un tereno priva.

            Rosel a menciona cu nan a papia pa basta tempo cu e doñonan di e tereno, pero no a haya contesta riba esaki, y e añanan aki a bolbe mira paletnan eyriba, y BCI no por haci nada cu esey pasobra e ta un tereno propio.

            Rosel a bisa cu riba e ruta di carnaval, tirando un vistazo durante e parada di mucha cu CBI a cubri, nan ta sumamente gradici cu e pueblo ta acepta e saconan pa hinca sushi.

            “Tambe mirando cu e añanan anterior nos no a haci esaki pero nos por a mira cu tabata tin hopi desperdicio cu a keda atras durante e añanan anterior.

            Despues nos tabata riba Lighting Parade pa reparti saco. Nos lo ta net un ora despues cu e baricadanan wordo buta den tur parada, y tambe nos kier pidi comunidad di Aruba p’asina bay haci uso di e saconan aki, ban tira e desperdicionan den dje, pa ora Serlimar pasa recoge e sushinan nan haya e saconan mara unda abo como persona a tira tur desperdicionan den dje.