Ministro tambe a felicita alumnonan cu e Parada Escolar exitoso na Playa

ORANJESTAD (AAN): Diabierna mainta, Minister Endy Croes a presencia Parada Escolar 2024 di e scolnan preparatorio y basico di Playa.

E parada a sali for di veld Cricket, pasa den e cayanan di Oranjestad y termina na veld di RCA.

   Un total di 12 scol parti den 5 grupo a participa den Parada Escolar. Tabata reina un ambiente fenomenal. Un publico sumamente grandi a disfruta di e parada cu hopi zjeito y un ambiente total. Un mainta yena cu energia, creatividad, color y musica. Nos muchanan a gosa di nan parada.

   Minister Endy Croes ta manda palabra di elogio na tur alumno, maestro y mayor di e scolnan cu a participa den e parada aki. Tambe, mandatario di Enseñansa y Deporte ta gradici e scolnan, comision organizado y tur esnan cu a contribui pa haci e parada aki posibel y super exitoso. Danki pa engrandece Aruba su Carnaval 70. Minister Endy Croes ta desea Aruba un dushi temporada di Carnaval 70. Ban celebr’e conscientemente.