Ministro Rocco Tjon ta convenci cu mas colaboracion entre CEA y DV&O ta positivo

ORANJESTAD (AAN): Diaranson mainta Minister di Husticia y Asuntonan Social a reuni cu director di CEA, sr. Geerman y cu director di operacionnan di "Dienst Vervoer & Ondersteuning"(DV&O).

E ultimo ta un departamento cu ta forma parti di "Dienst Justitiële Inrichtingen" cu ta resorta bou e Ministerio di Husticia y Seguridad di Hulanda.

   COLABORACION ENTRE CEA Y DV&O: Pa basta tempo tin e deseo di colaboracion mas estrecho entre e dos departamentonan. E colaboracion aki lo ta riba diferente aspecto pa mehora funcionamento di e departamento pero tambe pa brinda e empleadonan mas posibilidad.

   Director di CEA a indica cu e colaboracion desea lo ta riba e tereno di enseñansa, sosten riba diferente area di trabao di CEA y tambe material. Den cuadro di esaki por pensa tambe riba colaboracion entre e "opleidingsinstituut" di e departamento Hulandes cu scol di polis. E opleidingsinstituut di "Dienst Justitiële Inrichtingen" ta traha di cerca caba cu e academia di polis na Hulanda.

   E colaboracion aki lo por nifica hopi pa e "carrière-lijn" di e trahadornan den Husticia y pesey Minister di Husticia, sr. Tjon, ta kere den un convenio asina. Otro siman lo reuni cu e "plaatsvervangend algemeen" director sr. Jelte Penninga pa wak con lo por yega na formalisa e colaboracion aki mas pronto posibel.