Cuanto Arubiano a scucha debate Parlamento riba placa pa Raad van Advies? - *Debatenan den Parlamento mester splica loke politico ta dicidi pa Pueblo - *Mester presenta documentonan di Colegionan di Conseho como base
ORANJESTAD(AAN)—Ora DIARIO papia di elevacion di e calidad di trabou di Parlamento, directamente nos ta opone e hecho cu demasiado tempo ta wordo dedica den Parlamento na hunga sabi of papia pa papia.
Ora Parlamento reuni, e ta trata directamente presente y futuro di e pais. Ora nos pidi “apertura” di Parlamento, nos no ta pidi un desfile diario di militarnan y ceremonianan, pero nos ta pidi entrega y bon presentacion di documentonan importante mester yuda Pueblo di Aruba comprende pakico Miembronan di Parlamento ta aproba of desaproba loke ta riba agenda.
Pa analisa e realidad di “apertura” di Parlamento enfrente Pueblo di Aruba, nos a pone central e pregunta cuanto Arubiano a scucha y comprende e motibo pa cual ayera Parlamento di Aruba a trata e placa cu ta drenta y sali na Raad van Advies.
Nos a haci nos mes e pregunta aki, pasobra Parlamento na momento cu Aruba mester a realisa su Status Aparte, a hunga e papel central cu democracia ta exigi di e representacion di Pueblo.
Reunionnan di Parlamento den pasado, tabata uno di e topiconan mas importante pa medionan di comunicacion, cu tabata analisa, presenta, splica documentonan y posicionnan politico riba loke Parlamento tabata trata, na Arubianonan.
Documentonan relevante pa Parlamento dicidi riba un ley, riba cambionan den ley cu ta base pa tur loke ta wordo dicidi pa Aruba incluso gastamento di placa, tabata wordo analisa y presenta pa Pueblo dor di medionan di comunicacion cu no tabata depende di loke politiconan kier a manda como “comunicado”.
Importante den presentacion di informacion di Parlamento na Pueblo di Aruba, tabata e documentonan di “Colegionan di Conseho”, Raad van Advies, Algemene Rekenkamer Aruba, Conseho Social Economico y e representante di Aruba den Raad van State.
Ayera a trata Presupuesto di Raad van Advies. Pakico Pueblo ta paga pa un “Raad van Advies”? Pakico “Raad van Advies” mester tin gasto y entrada?
Pa representantenan di Pueblo, pa Miembronan di Parlamento tuma un decision, e relatonan y consehonan di Raad van Advies ta e guia mas grandi.
Raad van Advies ta conseha Gobernador, ta conseho Gobierno y ta presenta tur punto pakico un ley por pasa of no pasa y kico ta bon of malo den loke ta wordo presenta.
Pa DIARIO informa Aruba, informacion di Raad van Advies y e otro colegionan consehero ta crucial. Ta a base di nan investigacion di e materia y nan conseho, DIARIO por entrega Aruba conclusionnan di trabou cu Gobierno y Parlamento ta haci na nomber di Pueblo y na interes di Pueblo.
Aruba ta drenta un epoca, den cual ta sumamente importante pa tur miembro di comunidad informa su mes debidamente manera sigur tabata antes ora Aruba mester a trece cambio den su base estatal, Status Aparte.
Awe Aruba mester drenta un futuro nobo. Nos Estado di Derecho ta nifica cu gasta placa, nombra hende, habri un school, tur loke mester pasa na e pais, mester ta hancra den ley.
Como ehempel pa nos analisis di awe y e conclusion cu mester alcansa, nos kier presenta e necesidad di sosten di informacion di Raad van Advies den e trabounan periodistico di DIARIO.
Na 2018 Aruba mester a tuma medida. Aruba mester a dicidi kico ta haci cu Citgo. Aruba mester mester a atende cu decisionnan di pasado pa dicidi kico mester a dicidi pa futuro.
Pa DIARIO por a haci su trabou, el a bay den rapportnan di Raad van Advies, di Algemene Rekenkamer Aruba, di Conseho Social Economico y manera semper DIARIO a trece dilanti, a base di nan conclusionnan bisa Aruba kico segun nos Estado di Derecho tabata bon, malo, peligroso, destructivo, corecto.
Awor cu Aruba ta subi un caminda nobo, e opinion di Miembronan di Parlamento na Pueblo, manera transmiti dor di medionan di comunicacion, mester ta basa riba loke expertonan, Colegionan di Conseho, ta conseha y no riba loke opinion politico bashi kier dicidi!
Medionan di Comunicacion mester presenta informacion corecto y di nivel na Pueblo, pa asina informacion corecto di Parlamento bira apertura real na Pueblo di e loke Parlamento ta dicidi na nomber di Pueblo.
