Ministro Rocco Tjon cu un mainta fructifero na Departamento di Asuntonan Social

ORANJESTAD (AAN): Recientemente Minister di Husticia y Asuntonan Social Sr. Rocco Tjon a bishita Departamento di Asuntonan Social (DAS),

caminda a haya e oportunidad pa sinta cu e directiva y e empleadonan pa asina brindanan informacion di e desaroyonan pa loke ta e departamento aki. Na mes momento a logra combersa cu nan y scucha di nan banda kico ta nan pensamentonan y nan necesidadnan pa cu e desaroyo di nan departamento.

   Durante e bishita aki, a logra combersa cu e personal, caminda a toca diferente aspectonan cu ta toca e reorganizacion cu lo tuma luga dentro di poco, pero tambe a scucha di nan banda kico ta nan ideanan y preocupacionnan como tambe kico nan ta wak cu lo mester tene cuenta cune.

   Pues, un mainta hopi fructifero, y parti merdia a haya e oportunidad pa combersa cu tur e afdelingshoofden, caminda e chefnan a trece diferente puntonan padilanti, puntonan cu sigur Ministerio di Husticia y Asuntonan Social lo tene cuenta cune.

   Aki no ta trata solamente e partinan di material of parti di proyectonan cu ta worde ehecuta, pero particularmente tambe cambionan cu nan mes ta desea di wak cristalisa den cuadro di e reorganizacion cu ta na caminda, y con nos lo por adapta mucho mas miho na e demanda cu ta worde poni riba DAS  den e caso aki.

   Segun e Mandatario, un parti hopi interesante di e bishita aki tabata e hecho cu a logra combersa cu e personal di e diferente seccionnan na DAS y scucha di nan banda e diferente angulonan cu nan ta wak di cierto proyectonan cu mester worde mehora.

   Na final di dia, a haya oportunidad pa combersa cu e directora y e directora suplente di DAS, caminda a traha palabracionnan concreto di con ta bay percura cu e puntonan cu a worde treci padilanti door di e personal worde ehecuta. Pues, un dia sumamente positivo, caminda por sigura cu e tipo di bishitanan aki lo continua durante e añanan venidero, y entre otro na Departamento di Asuntonan Social tambe.