Cargamento di 874 kilo di cocaina confisca na Barranquilla

Scondi mey-mey di bebida di Aloë

BARRANQUILLA: Tur esaki a socede, danki na e cacho anti-droga cu tin e nomber ‘Tako’.  Cu su nanishi skerpi, el a yuda Unidad Anti-Droga di Polis captura e droga aki, den cuadro di e Operacion Arcangel cu ta tumando lugar na Barranquilla, Cartagena, y Puerto Rico.

   E total di 874 kilo di cocaina aki tabata scondi mey-mey di un cargamento di bebida di Aloë Vera cu tabata empaketa y ta cla pa sali riba un barco rumbo pa Spaña.

   Un unidad di e Polisnan Anti-Droga a bisa cu ta un cacho special cu ta yuda detecta droga, cu yama ‘Tako’, ta esun cu a haya e material den un container.

   Segun un boletin, e 874 kilo di cocaina aki tabata mezcla den forma liquido den un carga tipo exportacion di Aloë Vera cu ta bayendo Spaña.  Cu e nanishi skerpi di Tako, a detecta e droga liquido mezcla den un cargamento di boternan di bebida Aloë Vera den un container.

   E substancia a wordo manda pa un Laboratorio special di Polis Nacional, unda cu a confirma cu e cocaina tin un peso di 874 kilo.

   Segun Polis, e droga aki ta pertenece na e Clan guajiro ‘Pushaina’, y el a yega eynan for di Bahia Honda na Alta Guajira.

   Polis a confirma cu extra vigilancia na Waf durante ultimo simannan ta den cuadro di Operacion Arcangel, cu a wordo desaroya na Barranquilla, Cartagena, y tambe e isla di Puerto Rico.

   E Operacion aki a start dia 27 di Februari 2023, y den prome siman mes nan a haya 5.9 ton di droga.