Iraida Thijsen, nutricionista di IBiSA:
ORANJESTAD (AAN) – Tocante e tema di obesidad, señora Iraida Thijsen, Nutricionista di IBiSA, den entrevista cu DIARIO el a menciona cu no ta solamente e parti di alimentacion y actividad fisico ta hunga un rol.
Thijsen a señala cu den nos comunidad ta gusta come aroz cu batata hunto, y diferente carbohidrato sin ta conciente riba su efecto pa salud.
Tin mas factor cu ta hunga un rol, por ehemplo un bida sedentario. No kiermen cu, pasobra un hende ta haci un ora di actividad fisico e ta tur cos. Mester move durante e dia tambe. Sinta 23 ora y move un ora so, esey no ta yuda.
Falta di drumimento tambe ta un factor di riesgo; tambe e aspecto genetico. El a comenta cu tin hende ta haya holo di cuminda y ya ta yen, pero tin hende cu ni si e come un baca e ta keda mescos. Cada persona mester sa con di famia e ta, pa e adapta su estilo di bida, su cuminda, su actividad fisico na su sistema di biba cu ta bon pe.
El a menciona e parti di biologia unda cu e curpa ta defende su mes, e acceso na cuido, e fasenan di bida. Mas e edad subi, vooral cerca hende muher, mas dificil ta bira pa baha peso, pero e no ta imposible pa e persona ta conciente di esey, y traha riba dje.
E parti di marketing ta hopi obvio e temponan aki, pa cuminda no saludable tambe pa nos muchanan, y esey tin efecto riba nos manera di come y biba. Tambe e parti di salud mental.
Tin algun malesa mental cu tin su efecto y ademas e aspecto di stigma y e pensamento con e persona ta wak e tipo di problemanan aki.
Pues, e ta full un impacto, un ambiente rond di bo cu ta promove of no promove e bida saludable.
