Ministro Rocco Tjon contento cu Fase 4 di proyecto di Camara di Vigilancia a keda formalisa

ORANJESTAD (AAN): Durante un conferencia di prensa extraordinario teni Diamars mainta trempan door di Gobierno di Aruba,

a tuma luga e firmamento di e Decreto Ministerial como tambe e oferta di Setar, pa loke ta fase cuater di proyecto di camara di surveillance.

   Ta trata di un proyecto multi-ministerial. E proyecto aki ta conta cu e sosten y participacion di Ministerio di Husticia y Asuntonan Social; Ministerio di Salud Publico y Turismo; Ministerio di Asunto Economico, Comunicacion y Desaroyo Sostenibel; Ministerio di Integridad, Naturalesa y Cuido di Grandinan. Fase cuater, lo percura pa mas camara den e binnenstad di Oranjestad, elevando asina e siguridad di nos comunidad como tambe di nos turistanan.

   Manera ta conoci, e plan di maneho di Ministerio di Husticia y Asuntonan Social pa loke ta combati criminalidad, ta enfoca specificamente riba inversionnan den tecnologia, pa di e forma ey combati criminalidad y alavez percura cu e unidadnan policial por traha mas a base di informacion. Ya caba a ehecuta diferente fasenan, entre otro e beach-side di e high rise area, e hot zone, e binnenstad di San Nicolas, y e Operation Command Center na Savaneta, cual ta bay ta e curason di henter e proyecto aki, caminda tur e fasenan y e imagennan ta bay worde centralisa. Banda di esaki, tin e cuarenta puntonan strategico tambe cu ya cabata ekipa cu camara.

  Cu e formalisacion di fase cuater, lo bay ekipa e binnenstad di Oranjestad cu camara di surveillance, pa cual motibo a uni forsa cu demas ministerionan, mirando e diferente areanan cu esaki lo bay enfoca riba dje. Ta trata areanan turistico, areanan di comercio, areanan cu ta trata e parti di parkeer, pero tambe for di husticia ta trata di puntonan strategico, pa combati criminalidad.

   For di inicio di Gabinete Wever-Croes II, Aruba tabata conoce cero camara pa loke ta trata eleva siguridad, y awe den apenas dos aña, a logra instala mas di 250 camara, pa asina aumenta siguridad na pais Aruba. A base di cifranan, por a tuma nota di un reduccion pa loke ta trata e tiponan di criminalidad, particularmente “high impact crimes”.

   Por ultimo, e mandatario a expresa cu e ta satisfecho cu e logro aki, pa asina inicia cu e ehecucion di fase cuater di e proyecto di camara di surveillance. Un danki na e grupo di trabao cu, ta consisti di profesionalnan di sector priva y publico, cu a traha incansablemente pa loke ta e Decreto Ministerial pa e proyecto aki, na tur Minister cu ta forma parti di e proyecto como tambe Setar pa nan contribucion.