Ministro Rocco Tjon a reuni cu tur hefe di departamento pa prepara pa muda pa ex-Codemsa

ORANJESTAD (AAN): Siman pasa Minister di Husticia y Asuntonan Social Rocco Tjon a haya un recorido amplio di e ex-edificio di Codemsa na Cumana.

Esaki ta e lugar caminda ta bay ubica diferente departamento cu ta resorta bao di e Ministerio aki.

   Na maart di aña pasa a firma un "letter of intent" cu APFA pa explora posibilidadnan pa bin cu un localidad caminda por ubica varios departamento, pa asina consolida e diferente prijsnan di huur, y yega na un edificio completamente nobo y moderno, cu ta tene cuenta cu e necesidadnan specifico di tur departamento. Esaki cu e condicion cu tur cos mester keda budget-neutral.

   APFA ta doño di e edificio caminda ex-codemsa tabata, y lo renoba y reconstrui esaki pa ubica tur e departamentonan. Te cu aworaki e departamentonan cu lo muda ta Inmigracion Aruba, Cuerpo Policial Aruba, Cuerpo Especial Arubano y Bureau City Inspector.  E planificacion di e proyecto aki ta pa fin di luna aki tur e necesidadnan, e Programma van Eisen, di e departamentonan worde entrega. Ministerio ta contestando e preguntanan di Raad van Advies riba e concepto di Ley pa asina por entrega esaki na Parlamento dentro di poco.

   E proyecto aki ta beneficioso pa diferente motibo. Trahadornan lo haya un edificio moderno y nobo for di cual nan ta traha, ta consolida diferente huurnan, ta ubica departamentonan hunto, cual ta baha gasto, procesonan lo ta mihor delinea. Y aworaki ta haya un edificio cu ta tene cuenta cu tur necesidad specifico. Pa fin di luna lo ricibi tur e informacion di e departamentonan, pa finalisa e contestanan pa raad van advies.

   Minister Tjon, ta wak back riba un reunion positivo cu e hefenan di e diferente departamentonan