Prome Ministro a bisa - ORANJESTAD (AAN): Como un siman pasa, ainda por corda con druk tabata den area di Hospital di Aruba,
ora cu hopi hende cu a sinti malo, a bay para oranan largo den rij pa por haya un chens di haci un PCR-test di Covid-19 na LabHOH.
Rijnan largo cu a hasta te yega bek na Avenida Nelson Oduber.
Diamars mainta durante conferencia di prensa teni riba parkinglot di ImSan na San Nicolas, a puntra Prome Ministro Evelyn Wever-Croes si acaso lo habri un otro Covid Test Center na Aruba, pa asina alivia e presion riba e zona di Hospital.
Prome Ministro a indica cu e problema di Covid-Test a empeora durante e ‘piek’ di dos pa un siman pasa, cu a haci e area rond di Hospital hopi druk.
Wever-Croes a bisa cu na e momento aki, Aruba no tin tur e capacidad, ni financiero ni humano pa por atende manera cu a haci den pasado. Un pais manera Aruba di 120.000 habitante nunca di su bida por ta prepara pa atende cu p.e. 5.000 caso positivo cu a mira par di dia pasa.
“Nos a pasa den momentonan sobre-humano cu pa un pais manera Aruba nunca bo por ta bon prepara pe, pesey cosnan a pega un poco,” Wever-Croes a indica. “Pero awor nos tin un mihor bista, e cifranan ta bahando, y unavez nan cuminza baha, bo por reparti bo capacidad humano tambe entre Pabao di Brug y Pariba di Brug. Na e momento eynan no tabata posible, y a evalua cu e momento cu habri e di 2ndo Test Center, esey lo bay ta na San Nicolas, pa asina esnan Pariba di Brug por ta mas cerca.”
Segun Prome Ministro, e ta riba agenda ainda, y ta cosnan cu nan ta deliberando riba dje.
