DVG --- ORANJESTAD (AAN): Pa cu e ultimo dianan aki nos casonan di Covid-19 a subi drasticamente. Esaki ta trece cune cu por lo menos 1000 pa 1500 Covid test ta wordo haci na hospital.
Cada un di e testnan aki tin su costo cune y testnan por keda sali positivo pa basta tempo despues cu bo recupera di Covid-19 sin cu e persona ta infeccioso. Cu esaki, DVG kier conscientisa tur persona cu a test positivo pa Covid-19, pa no keda ripiti test te ora cu esaki sali negativo. Pa mes motibonan aki tambe nan kier concientisa doñonan di trabao y scolnan cu no ta e intencion pa exigi esnan cu a recupera recien di Covid-19, un test negativo pa por bin scol of trabao bek.
Si un persona a caba di recupera di Covid-19, no ta e intencion pa keda test mas pa bo trabao of pa scol. Mester sigui e protocol di DVG, cu si despues di 5 dia cu e persona tabata den isolacion y no ta sinti nada mas e por bay traha of bay scol bek. Si acaso despues di 5 dia ta sigui malo, ta meld esaki via e link cu e ta ricibi for di DVG den email.
Si un persona ta den cuarentena e por hasi un self-test despues di 5 dia, pero esaki no mester. Si e no tin sintoma despues di 5 dia e por bay traha bek. Si e trabao of scol ta rekeri un PCR test esaki NO lo wordo cubri door di AZV. Un persona por haci e test aki na un laboratorio priva riba su mesun gasto.
Covid test ta importante pero mester haci esaki conscientemente. E proceso cu esaki ta hiba cune ta keda intenso y tur cos mester wordo haci cu hopi cautela y precision pa cu e resultadonan.
Sea consciente y keda tene distancia social den lugarnan cu hopi hende, bisti tapaboca y usa sanitizer y laba bo mannan bon pa asina hunto por baha e cantidad di casonan positivo pa dia.
Si un persona ta sinti malo cu sintomanan respiratorio, y ainda no a test positivo pa Covid-19 den e ultimo 30 dianan, por fabor bay den isolacion y haci un test. Pa haya un cita pa haci e test, por tuma contacto cu docter di cas of yama 280-0101 pa solicita un code of por haci esaki via https://covid19test.healthapp.aw. Cu e code aki, por traha un cita via 'bo aruba health app'.
Pa cualkier informacion por yama 522-4200 of 280-0101 pa preguntanan encuanto covid-19.
