Ministro Rocco Tjon a atende e vierlandenoverleg tocante Desaroyo Social y Labor na Curaçao

WILLEMSTAD (AAN): Recientemente, Minister di Husticia y Asuntonan Social sr. Rocco Tjon tabata na Curaçao pa asina atende e Vierlanden Overleg,

tocante desaroyo social y labor, cual a tuma luga na Renaissance Hotel, na Curaçao. E reunion aki a ser inicia pa Minister di Desaroyo Social y Labor di Curaçao señora Ruthmilda Larmonie-Cecilia, kende a reuni cu demas minister y representantenan di Aruba, islanan BES, Hulanda, y Sint Maarten kende tabata presente virtualmente.

   Durante e reunion aki, cada pais a haya e oportunidad pa vocifera nan preocupacionnan y tambe trece padilanti temanan manera, pobreza, competencia den e trato laboral, ley migratorio, y e diferencia den servicionan social den cada pais. Banda di esaki, a comparti tambe presentacionnan tocante e situacion actual den cada pais, “best practices”, y cambionan previsto den e veld social, y a base di esaki a papia tocante con por traha mas di cerca cu otro y coopera mas cu otro pa asina reenforsa e veld social.

   Asina por bisa, cu a haci un esfuerso pa desaroya un relacion mucho mas estrecho cu demas paisnan pa loke ta planificacion y implementacion, asina ofreciendo oportunidadnan nobo pa cu e desaroyo social. Minister Tjon, a expresa di ta sumamente satisfecho cu e iniciativa exitoso aki di Minister Larmonie-Cecilia, y ta gradici’e y demas paisnan pa e bon reunion.

   A base di e resultado positivo di e reunion aki, a dicidi mesora pa haci e vierlandenoverleg den cuadro di desaroyo social uno anual, creando un plataforma sostenibel pa un miho cooperacion entre paisnan den reino. Tambe, a base di peticion di minister Tjon, a incorpora di awo padilanti riba e agenda e tema di proyectonan social, manera veilige bario’s, cual ta beneficioso pa e bienestar general di nos hobennan.