Awe ta e gran apertura di Festival di Buki pa Mucha 2023

ORANJESTAD (AAN): Awe 4 di november 2023 lo tin e apertura di Festival di Buki pa Mucha na Cas di Cultura.

E librerianan local lo ta presente desde 5'or di atardi y 6'or di atardi e show oficial lo inicia. Esaki ta di 31 Festival di Buki pa Mucha. Tema di Festival di Buki pa Mucha 2023 ta Mi Buki, mi cas! Durante e siman di 6 pa 10 di november, autor-, ilustrado- y contadonan di cuenta lo pasa rond di 50 scol preparatorio, scol basico y scol special y scol priva pa promociona lesamento.

   Lesamento ta importante, no ta importa den ki idioma nos ta lesa, basta cu nos lesa y pa nos tin comprendemento di lesa. Minister Endy Croes y Biblioteca Nacional Aruba (BNA) ta invita nos muchanan pa bay disfruta di un bunita show di apertura di Festival di Buki na Cas di Cultura diasabra awo.

  Finalmente, Minister di Enseñansa Endy Croes ta gradici directora di BNA, Sra Astrid Britten y tur esnan cu ta trahando riba e bunita proyecto educativo aki pa nan excelente trabou. Conocemento ta indispensabel. Mas bo lesa mas bo sa y mas bo sa, sabi bo ta!