Ministro riba e importancia pa ricibi archivonan colonial den forma digital

ORANJESTAD (AAN): Riba 1 di juli 2023 durante e acto conmemorativo di 160 aña di abolicion di sclavitud den Reino Hulandes, archivonan colonial digital cu ta inclui historia di nos pasado di sclavitud a worde traspasa for di Hulanda pa Aruba.

   Minister di Cultura Xiomara Maduro a ricibi for di Secretario di Estado di Husticia y Siguridad sr. Eric van der Burg, documentonan cu ta data for di 1828 te cu 1845. Na su turno, Minister Maduro a entrega esaki pa sr. Edric Croes cu ta encabesa e departamento di conservacion y preservacion na Archivo Nacional Aruba (ANA).

   Un alrededor di 70 mil scans di documentonan a worde pasa riba un harddrive y esaki a worde entrega diasabra ultimo na Minister Maduro. E scans ricibi lo worde haci accesibel door di Archivo Nacional Aruba riba e plataforma di coleccion.aw y lo aplica e tecnologia di HTR pa haci e documentonan digital mas facil pa nabega.

   E traspaso di e archivonan aki ta importante pa Aruba y nos herencia cultural especialmente considerando cu e ta trata di documentonan tocante nos antepasadonan. Manera sr. Edric Croes di ANA ta indica, e archivonan aki tin un conexion y laso familiar. Sin e documentonan aki, nos no por forma un bista completo tocante nos historia. E informacion aki ta esencial pa compronde e historia unico di nos pais durante un periodo unda cu colonista Europeo, Amerindio y catibo di West-Africa a mescla y asina a forma un poblacion nobo di habitante riba nos isla.

   Minister Maduro a indica durante e traspaso di e archivonan cu 1 juli 2023 ta marca un dia historico unda cu nos ta para keto y honra nos antepasadonan. E traspaso di archivonan ta simbolisa un acuerdo mutuo entre Hulanda y Aruba pa debolbe nos archivonan back na nos cas. Minister Maduro a gradici Secretario di Estado van der Burg y a finalisa bisando cu e pasado di sclavitud den Reino Hulandes y na Aruba ta un historia comparti: e ta di nos tur.

   E archivonan cu nos a ricibi ta conta e storianan di esnan cu a biba y experencia e periodo di sclavitud riba nos isla. A base di e informacion ricibi nos por honra nos antepasadonan, comprende nos presente y traha riba e sanacion necesario pa fiha riba un miho futuro pa nos mes, como pais y como Reino.