ORANJESTAD (AAN): Durante e anochi di graduacion di Juliana School, cu a tuma lugar den ballroom di Hilton Aruba Caribbean Resort, tabatin momentonan special y basta emocional.
Felicidad pasobra Juliana School MAVO a logra un porcentahe di graduado di 97%. Pero tiki tristo como cu un di e mihor docentenan di Natuurkunde ta retira.
Esey ta ora cu cabezante Juffrouw Paula Croes a divulga, cu e tan respeta docente, esta Meneer Roga a haci esaki su ultimo aña di duna les.
Durante e anochi special aki a despedi di Clyde Roga cu ta bandona enseñansa despues di a traha 27 aña na Juliana School como docente di e materia Natuurkunde.
Meneer Roga ta un docente kende ta yama tur su alumnonan pa nan fam. Y esaki ta algo cu ta fomenta respet, y tabata ricibi esaki tambe. Su amor y pasion pa duna les di Natuurkunde, a keda demostra con valioso e ta pa yuda alumnonan sigui engrandece nan estudio den futuro. Esaki a keda demostra ora cu e anochi ey, dos ex-alumno cu a sobresali den Natuurkunde na MAVO, y despues a usa e experticio aki pa gradua despues na HAVO y VWO a presenta pa duna gradicimento na Meneer Roga y tambe conta algun anecdota.
A laga Meneer Roga cu su esposa, y tambe dos yiunan bin dilanti y aki a duna nan un regalo di aprecio. Na su turno, Meneer Roga tambe a otorga algun docente un regalo.
Minister Endy Croes tambe tabata presente, y a gradici Sr. Roga y den nomber di Gobierno di Aruba a entreg’ e un roconocemento di aprecio pa e dedicacion y profesionalismo durante 27 aña den enseñansa di Aruba.
