ATIA cu carta urgente pa Ministro encuanto BBO na Frontera

Nan kier sa si acaso a haci e cambio of no

ORANJESTAD (AAN): E siman aki, Asociacion ATIA a dirigi un carta urgente pa tanto Ministro di Finanzas, como tambe Director di DIMP relaciona cu e reunion cu lo tuma lugar den Parlamento awe Diaranson 5 di Juli relaciona cu BBO na Frontera.

   Specificamente riba e asunto ey, ATIA ta indica cu nan no a haya indicacion si acaso a sugeri of haci cambionan na e proyecto di ley como resultado di e sesionnan informativo y e aporte cu sector priva a duna.

   ATIA ta informa Ministro y DIMP, cu hasta despues di e sesionnan informativo, ainda tin hopi incertidumbre entre e comerciantenan local, specialmente riba e termino di “handelsgoederen”, y con e prijsnan lo wordo afecta cu e introduccion di e ley.  Ta un hecho cu prijsnan lo aumenta, hasta pa e negoshinan cu ta bende solamente productonan comercial, ya cu, por ehemplo coolernan, reki pa paña, y cash registernan no ta producto comercial pues e lo hisa e gastonan operacional.

   E mihor opcion lo ta pa bin lo mas cerca posible di un “sistema BTW” ta door di elimina e definicion “handelsgoederen” for di e ley, cu nifica cu tur articulo importa pa negoshi lo tin derecho pa un credito di BBO, cu lo no aumenta e gastonan operacional pa negoshinan (y asina no hisa prijsnan).  Adicionalmente, e opcion aki ta facil pa ehecuta pa tanto e empresarionan como tambe pa Departamento di Impuesto (DIMP) y lo bay resulta den mas cumplimento, y asina, trece mas entrada pa Gobierno.

   Si esey no ta posible, e alcance di e definicion tin di wordo clarifica den e ley, of a lo menos den e notanan di toelichting di e ley.  ATIA a finaliza bisando cu e definicionnan claro di “handelsgoederen” cu ta bay evita discusionnan ta beneficioso pa comercio, DIMP, y entradanan pa Gobierno.

   E carta di ATIA ta firma pa director Herrick Henriquez.