Ministro Plenipotenciario Thijsen nombra como ‘Association Ambassador’ di AEFA

ORANJESTAD (AAN): Informe for di Hulanda ta indica cu durante di un celebracion di Pasco na Kasteel Terborgh na Limburg di “America Europe Friendship Association- AEFA”,

Minister Plenipotenciario di Aruba mr. Ady Thijsen a keda nombra como “Association Ambassador” di AEFA. Pa conmemora e momento aki sr. Thijsen a ricibi for di man di drs. Arthur Lieuwen, presidente di AEFA y burgemeester di Brunssum Wilma van der Rijt, un acta oficial.

   Minister Thijsen a gradici AEFA pa e titulo di “Association Ambassador” y a bisa di ta honra cu e hecho aki. Minister Thijsen a papia den un discurso riba e relacion entre Aruba y Estados Unidos y tambe riba e posicion di Aruba den Reino y pa cu Union Europeo. ‘E relacion entre Aruba y Merca a inicia cu establecimento di e refineria di LAGO na San Nicolas. Esaki a nifica un boost enorme pa economia di Aruba, cu prome cu esey no tabata conoce un actividad economico asina grandi. E relacion cu Merca a intensiva su mes, na momento cu Aruba na 1959 a habri Aruba Caribbean hotel cu a marca e cuminsamento di e industria di turismo na Aruba.

   Desde un principio y te cu awe Aruba ta gusta pa e turista Mericano. Casi 80 porciento di e mas di 1 miyon turista cu anualmente ta bishita Aruba ta procediente di Merca,’ asina sr. Thijsen a bisa.

   Minister Thijsen a mustra riba e hecho cu e bon relacion entre Aruba y Merca a resulta cu Aruba tin un Preclearance Mericano na aeropuerto internacional Reina Beatrix. Minister Thijsen: ‘Aruba hunto cu Bahama’s y Bermuda ta e unico islanan den Caribe cu tin e facilidad aki. E relacion entre Aruba y Merca ta keda importante riba tereno di comercio. Por ultimo mi mester bisa cu e relacion unico aki tambe a conduci cu Minister di Enseñansa di Aruba a logra cera convenionan cu Universidad na Merca pa crea oportunidad favorabel pa nos studiantenan. Mescos cu AEFA ta boga pa un bon relacion transatlantico entre Merca y Europa, Aruba tambe tin un afecto grandi pa un relacion bon y fuerte cu Merca y Europa.’

   E mandatario a menciona cu Aruba a haya su status di pais autonomo den Reino na 1986 y esaki ta haci cu Aruba tambe ta parti di Europa. ‘Nos ta kere den un Reino fuerte, basa riba confianza mutuo y respet. Aruba tambe ta miembro di OCTA, unda nos tin e sosten di Union Europeo. Esaki ta e unico manera cu nos por traha hunto pa e retonan di futuro, manera cambio di clima y e transicion di energia. E hecho cu Aruba ta keda entre Norte y Sur America, e tin tanto e cultura Caribense y Latino, como e educacion y formacion Hulandes Europeo, cu ta haci Aruba excepcional y fuerte. Aruba a haya un sla duro door di Covid 19. Pero Aruba a mustra elasticidad. Aruba no unicamente a bons back, pero a bons padilanti,’ segun Minister Thijsen.

   Sr. Thijsen a finalisa cu discurso cu un gratitud grandi pa AEFA pa nan confianza den su persona y Aruba y cu elo pone tur loke ta den su capacidad pa honra e titulo di “Association Ambassador” di AEFA. Finalmente Minister Thijsen a probecha di e oportunidad pa desea tur presente un Bon Pasco y un Feliz Aña Nobo.

E celebracion a sigui den un esfera hopi ameno y festivo.  E potretnan ta cortesia di Arubahuis.