Luna di november 2023 a revela un crecemento di 12.7% di bishitante compara cu aña 2022

Minister Dangui Oduber

ORANJESTAD (AAN):  Minister di Turismo y Salud Publico sr. Dangui Oduber ta informa cu a ricibi e resultadonan pa e luna di November 2023 encuanto turismo for di Aruba Tourism Authority (ATA). Pa luna di November 2023 e cifranan ta demostra cu Aruba e ricibi 1,116.223 turista via nos aeropuerto y den estudio di Centrale Bank Aruba ta demostra cu turistanan ta gasta 21.3% mas den November den comparacion cu aña 2022.

            E reportahe ta demostra cu 11.1% di turistanan ta hospeda na hotel, 4.7% ta keda na all inclusive, 3.4% ta uza timeshare y 18.7% ta cay den e categoria di vacation rentals. E top 3 mercadonan di bishitantenan cu ta yega Aruba ta di Colombia 55.1%, Argentina 46.8% y Brazil 41.3%. 

            Locual a resalta den e reportahe tambe ta e crecemento di e mercado di mas grandi cu ta keda tambe e mercado di Norte America. E estadonan cu mas a crece di Merca ta Illinois cu 21.9%, Ohio cu 27.3% y Virginia cu 27.2%.

            Turismo ta sigui crece y sigui surpasa nivelnan di aña 2022 cual sigur ta excepcional. Tambe ta pa nota cu motibo di bishita pa e luna di November 2023 en comparacion cu 2022 ta pa conferencia, shopping y meetings na Aruba. Tur indicador ta demostra cu e experiencia general di e bishitante ta keda uno halto y ta wordo clasifica cu 9.1 y cu gastronomia 9.5 cu sigur ta indica cu nos bishitante nan ta hopi satisfecho cu nos gastronomia na Aruba.

            Otro indicacion sumamente importante ta cu cruceronan tambe ta sigui demostra confiansa den Aruba cu un crecemento di 36.9% den luna di November 2023 den comparacion cu 2022.

Maneho di Minister Dangui Oduber ta dirigi riba un maneho di turismo sostenibel, enfocando riba turistanan di calidad pa por sigui haci inversionnan continuo den producto Aruba y percura pa diversifica Aruba su turismo.

            Finalmente, Minister Oduber ta gradici tur partner y tur cu ta laborando den e industria di turismo. Tur e personanan aki ta haci cu awe Aruba ta surpasando tur expectativa den su recuperacion.

Danki na e pueblo cu a demostra di ta uno resiliente, ban sigui demostra nos cordialidad y duna e hospitalidad na nos bishitantenan cu nos ta conoci pe. Sin lubida nos asset di mas grandi cu ta nos hendenan.