ORANJESTAD (AAN): E siman aki, Minister drs. Melvin Wyatt-Ras a representa Prome Minister di Aruba, mr. Mike Eman,
durante e celebracion oficial di e 223 aña di Dia di Bandera Haitiano, organiza door di Consulado General di Haiti na Aruba na Biblioteca Nacional di Aruba.
Durante e celebracion, Minister Wyatt-Ras a comparti un mensahe di reconocemento y aprecio pa comunidad Haitiano na Aruba, destacando e importancia di unidad, resiliencia y orguyo cultural.
Den su discurso, e Minister a enfatisa cu e bandera Haitiano ta un simbolo poderoso di libertad, dignidad, perseverancia y orguyo nacional, y cu e historia di Haiti ta sigui inspira pueblo den Caribe y mundialmente.
E Minister tambe a reconoce e contribucion valioso di comunidad Haitiano na Aruba y e conexion entre Aruba y comunidad Haitiano, construi riba convivencia, solidaridad y respet mutuo. Ademas, e Minister a reafirma e importancia di un sociedad inclusivo unda diferente comunidad y cultura ta contribui activamente na desaroyo di nos isla.
E celebracion a reuni miembronan di comunidad Haitiano, cuerpo diplomatico, representantenan gubernamental y invitadonan special den un ambiente di cultura, union y aprecio mutuo.
Durante e mainta cultural, invitadonan a disfruta di un presentacion di baile tradicional, musica di J Ralph y musiconan invita, y tambe un exhibicion di arte cu a destaca herencia y expresion artistico Haitiano.
E acto a culmina cu un mensahe special na honor di Dia di Bandera Haitiano: “Cu e bandera Haitiano sigui bula halto como un simbolo di speranza, curashi, union y resiliencia.” Bòn Fèt Drapo Ayisyen.
