E lo ta gratis
ORANJESTAD (AAN): Centro di Bario Noord ta clausura su celebracion di 55 aña di existencia cu un Fiesta Bailabel Comunitario (CBN).
Di e forma aki, Centro di Bario Noord ta celebra su 55 aniversario dunando bek un fiesta na su comunidad. DIARIO a haya sa, cu e evento ta ser titula ‘Fiesta Comunitario’, y e lo ta un fiesta bailabel cu lo tuma lugar Diasabra 23 di Mei 2026 di 8:00 pm te cu 1:00 am na Centro di Bario Noord.
Hopi ta corda con pa 55 aña, CBN a fungi como e curason di comunidad, fungiendo como un lugar sigur pa mucha, hoben, adulto y adulto mayornan pa reuni, intercambia, siña, deshoga, socialisa, haci deporte y apoya otro.
“Nos no ta laga ningun hende atras”, segun dirigentenan di CBN a indica. “Integracion y intercambio cultural ta biba den nos institucion.” E celebracion aki ta un iniciativa pa duna bek y a bira posibel danki na e aporte y colaboracion cu a ricibi di Setar, APA, ATA, Balashi, Aruba Hilton, Empresa Italo Arubano y mas organisacionnan cu tambe a aporta y ta alinea cu e mision y vision di CBN.
E fiesta ta habri pa full comunidad di Aruba, cu enfasis na invitacion na ciudadanonan di Noord. Durante di e Fiesta Comunitario e siguiente gruponan lo deleita tur presente cu nan musica, esta DJ Metropolis, Jerino y su Banda Mini D, Solo Banda Show, y Taxi Dancers. E bon noticia ta cu entrada ta djis un sonrisa. Esey ta simbolisa alegria, union y gratitud. Bar y cushina di CBN lo ta bon surti. Lo tin diferente doorprize pa rifa entre esnan presente.
Directiva di CBN ta probecha pa gradici tur tur persona cu di un of otro manera a duna un aporte of contribucion sea como miembro di directiva, comision, usuario, consehero durante e ultimo 55 añanan y ta extende un invitacion caluroso pa tur yega CBN diasabra awor y hunto conmemora y celebra CBN su 55 aniversario.
