Ministro Glenbert Croes bishitando Hotel Riu Plaza España

ORANJESTAD (AAN): Durante su bishita na Spaña, Minister di Energia Glenbert Croes a tuma e oportunidad di haci un bishita na Hotel Riu Plaza España,

na unda el a worde cordialmente ricibi pa e Director di Operacion sr Manuel Jaile y Director General sr. Javier Flórez Alzueta.   Hotel Riu Plaza España ta un hotel emblematico na Madrid cu ta hopi popular y ta ofrece facilidadnan di calidad halto.

  Mirando e exito na nivel mundial di e cadena di Riu Hotel, Gobierno ta sumamente orguyoso di por conta cu dos Riu hotel na Aruba. E mandatario a gradici nan pa tur e inversionnan haci riba nos isla. Riu Antillas y Riu Palace na Aruba, ta percura pa constantemente mehora nan facilidadnan, pa asina semper ofrece e bishitantenan un lugar "all inclusive" di calidad halto. E relacion entre Gobierno di Aruba y Hotel Riu pa loke ta trata trahadonan y comunicacion en general ta uno positivo. 

  "Nos a expresa nos gratitud y felicidad di mira e exito y embergadura di e cadena Riu. Nos ta orguyoso di tin hotelnan Riu na Aruba y ta gradicinan pa tur e inversionnan haci den pais Aruba. Nos ta deseanan hopi exito y spera di por mira desaroyonan continuo y positivo." Minister Croes a expresa.