Weganan Escolar ta cuminza dia 26 di Mei

ORANJESTAD (AAN): Den fin di siman a lansa oficialmente Weganan Escolar (WE) Aruba 2023. Presente na e ocasion special aki tabata: Prome Minister di Aruba señora Evelyn Wever-Croes,

Parlamentarionan di Coalicion, directivanan di scol, instructor y docentenan di deporte y demas invitadonan.

   Weganan Escolar 2023 ta un proyecto deportivo cu ta worde presenta pa Ministerio di Enseñansa y Deporte y IBiSA. Un di e metanan di WE Aruba ta pa promove deporte bou di alumnonan di scol preparatorio, basico y secundario. Deporte ta fomenta union, alegria y crea amistad. Tambe deporte ta trece positivismo sin lubida cu e ta sano. Deporte ta e vehiculo pa hiba bo semper riba e bon caminda, deporte ta trece union y deporte ta crea lider.

   Weganan Escolar ta un competencia pa alumnonan di scol preparatorio, basico y secundario cu ta competi den seis diferente disciplina e.o. futbol, basketball, volleyball, badminton, functional fitness y beach tennis. Un total 975 alumno di 40 scol ta participa na Weganan Escolar 2023, esta 12 Scol Preparatorio, 20 Scol Basico, y 8 Scol Secundario.

   E gran apertura di WE Aruba 2023 ta tuma luga na Compleho Deportivo Frans Figaroa dia 26 di mei y ta clausura 10 di juni na Joe Laveist Sport Park na San Nicolas.