Ministro Geoffrey Wever y CAft ta evalua desaroyonan positivo di economia

Tambe di finansa publico di Aruba...

ORANJESTAD (AAN): Minister di Finansa, Asunto Economico y Sector Primario, Geoffrey Wever, a reuni recientemente cu Colegio di supervision financiero di Aruba (CAft), den cuadro di nan reunion periodico pa evalua desaroyonan economico y financiero di Aruba. Durante e reunion a dialoga riba diferente tema importante, entre otro e resultado positivo di economia, e surplus di finansa publico, e futuro di sector turistico y e Fondo General di Inversion y Desaroyo (AIOF).

   E reunion a brinda oportunidad pa intercambia punto di bista tocante e posicion financiero actual di Aruba y e prioridadnan strategico pa sigui fortalece economia y finansa publico di pais.

   E desaroyonan economico y financiero di Aruba ta mustra un imagen positivo. Den su evaluacion di e di dos informe di implementacion di 2026, CAft a conclui cu economia Arubiano ta sigui crece y cu entradanan di Gobierno ta desaroyando faborablemente. E resultadonan aki a contribui na un surplus financiero considerabel, mientras cu Aruba ta cumpli ampliamente cu e normanan financiero stipula den ley. E evaluacion aki ta importante, pasobra e ta mustra cu Aruba su posicion financiero ta permiti pais sigui traha riba reduccion di debe publico, mientras cu ta mantene atencion pa inversionnan necesario pa desaroyo di pais.

   Segun e ultimo evaluacion di CAft, na final di e di dos kwartaal di 2026, Pais Aruba a registra un surplus provisional di Afl. 261 miyon, mientras cu e sector colectivo a registra un surplus di Afl. 412 miyon, equivalente na 4,9 porciento di Producto Interno Bruto (PIB). Cu esaki, Aruba ta supera ampliamente e norma legal di un surplus minimo di 1 porciento. Ademas, CAft ta proyecta cu e ratio di debe publico lo yega na aproximadamente 61 porciento di PIB na final di 2026, basa riba e composicion anterior di e sector colectivo. E proyeccion aki ta pone Aruba dilanti riba e trayectoria di reduccion di debe acorda, aunke e determinacion definitivo di e sector colectivo por influencia e cifra final.

   Minister Wever ta considera cu e desaroyonan positivo aki ta brinda un base importante pa continua cu un maneho financiero responsabel, caminda disciplina presupuestario y inversion den futuro di Aruba ta bay hunto. Un surplus financiero no ta solamente un resultado positivo riba papel, sino tambe un oportunidad pa fortalece posicion financiero di pais, reduci e peso di debe publico y crea mas espacio pa inversionnan cu ta contribui na bienestar di comunidad.

   "Nos meta no ta simplemente pa cera un aña cu cifranan positivo. Nos meta ta pa construi un base financiero solido cu ta permiti Aruba sigui progresa, baha su debenan y inverti den e necesidadnan di nos pueblo. E resultadonan positivo ta importante, pero mas importante ainda ta con nos ta uza e oportunidadnan aki cu responsabilidad pa crea un futuro mas stabil y sostenibel pa Aruba," Minister Wever ta enfatisa.

   Un otro tema central durante e reunion tabata e desaroyo di sector turistico y su impacto riba economia di Aruba. Turismo ta sigui representa e motor principal di crecemento economico, pero na mes momento e dependencia grandi riba e sector aki ta trece vulnerabilidad pa economia y finansa publico. CAft a enfatisa cu e posicion financiero faborabel di Aruba ta brinda e oportunidad pa haci escogencianan strategico tocante e futuro di turismo, inverti den infrastructura y fortalece diversificacion economico.

Den e contexto aki, Minister Wever ta considera importante pa e crecemento economico di Aruba no wordo midi solamente na cantidad di turista, sino principalmente na e balor economico cu e actividad aki ta genera y e beneficio cu comunidad Arubiano ta ricibi. E desafio pa futuro ta pa mantene un sector turistico competitivo, mientras cu ta fortalece otro sectornan economico, stimula iniciativa empresarial, innovacion y desaroyo di sector primario. Esaki ta contribui na un economia mas diversifica y menos dependiente di un solo sector.

  Durante e reunion a dedica atencion tambe na Fondo General di Inversion y Desaroyo (AIOF), e instrumento legal y presupuestario cu Gobierno a establece pa planifica y structura inversionnan publico riba varios aña. Cu e creaccion legal di AIOF na juli 2026 y e tratamento di su prome presupuesto 2026–2027 den Parlamento, Aruba a tuma pasonan importante pa crea un sistema di inversion cu mas continuidad, transparencia y control cu gobiernonan di awo y den futuro lo por haci uzo di dje. E fondo ta dirigi riba inversionnan necesario den areanan manera infrastructura, enseñanza, renobacion urbano, energia y desaroyo economico.

   E importancia di AIOF ta relaciona directamente cu e necesidad pa Aruba probecha di su posicion financiero actual pa prepara y ehecuta inversionnan cu ta fortalece capacidad economico di pais. Pa Minister Wever, inversion publico mester ta basa riba prioridadnan cla, proyectonan bon prepara y un bon evaluacion di costo, sostenibilidad y beneficio pa comunidad. E enfoke aki ta esencial pa transforma espacio financiero den resultado concreto, manteniendo disciplina presupuestario y control riba uzo di recursonan publico.

   Minister Wever ta reconoce cu, a pesar di e resultadonan positivo, ainda tin trabao pa haci pa sigui fortalece e sistema di administracion financiero, mehora disponibilidad di cuentanan anual di entidadnan gubernamental y sigui reduci debe publico. E puntonan aki ta forma parti di e atencion continuo cu mester wordo duna na sostenibilidad di finansa publico, hunto cu e necesidad pa sigui mehora preparacion y ehecucion di inversionnan.

   "E posicion financiero cu Aruba tin actualmente ta brinda nos un oportunidad importante. Awor nos mester transforma e oportunidad aki den progreso concreto. Nos kier un Aruba cu finansa publico solido, un economia cu ta ofrece mas oportunidad y inversionnan cu ta contribui directamente na calidad di bida di nos pueblo. Pa logra esaki, nos mester sigui traha cu vision, disciplina y responsabilidad," Minister Wever ta indica.

   E reunion periodico cu CAft ta forma parti di e dialogo continuo tocante e maneho y sostenibilidad di finansa publico di Aruba. Minister Wever ta destaca importancia di mantene un relacion profesional, transparente y constructivo cu e instancia di supervision financiero. E intercambio regular ta brinda oportunidad pa evalua e progresonan alcanza, atende recomendacionnan y sigui fortalece e maneho financiero di pais.

   E desaroyonan positivo di economia, e surplus financiero y e reduccion proyecta di debe publico ta brinda un base solido pa Aruba continua cu su agenda di desaroyo. E prioridad ta pa conserva e stabilidad aki y, na mes momento, prepara inversionnan responsabel cu ta fortalece economia, mehora calidad di bida y crea mas oportunidad pa generacionnan actual y futuro.