Incineratornan di AWSS ademas di desecho medico ta destrui carni cu a caduca tambe

Director di Utilities Aruba NV Joseph Everon

ORANJESTAD (AAN): Director di Utilities Aruba NV, Joseph Everon, a informa den un entrevista cu DIARIO cu, segun e planificacion actual, tur tres incinerator grandi di Aruba Wastewater Sustainable Solutions (AWSS) lo ta operacional na cuminsamento di november. E trabaonan ta inclui preparacion di dos unidad nobo y mehoracion di e incinerator conoci como Line Zero.

   AWSS ta responsabel pa procesamento di desecho medico, sludge cu ta resulta di tratamento di awa sushi y desecho berde, entre otro e matanan cu DOW ta corta. Tambe e empresa ta atende cu productonan cu nan fecha di vencemento a pasa, incluyendo carni.

   Segun Everon, e dos incinerator grandi nobo y Line Zero ta den fase di prueba di siguridad y mantencion, prome cu nan drenta plenamente den servicio.

   Pa atende cu e desecho medico cu ta yega diariamente y evita cu esaki sigui acumula, a pone dos incinerator mobil mas chikito den operacion. Ora e unidadnan grandi ta operacional, AWSS lo cuminsa atende tambe cu e desecho medico cu a keda acumula durante varios aña.

    Everon a splica cu e preparacionnan ta inclui entrenamento di personal y implementacion di medidanan di siguridad. Ademas, a limpia e tereno rond di e facilidad pa facilita supervision y duna un miho bista di e trabaonan cu ta wordo ehecuta.

   Como parti di e mehoramentonan, a drecha e edificio y su dak, instala iluminacion nobo y a drecha oficina y espacio di break pa e empleadonan.

   Riba tereno di medio ambiente, Everon a indica cu a instala ekipo pa midi calidad di aire y monitorea e parametronan cu ta stipula den e hindervergunning. Segun su splicacion, e medimentonan continuo ta permiti controla y documenta si e operacion ta cumpli cu e exigencianan di e permiso.

   El a enfatisa cu e meta ta pa opera e incineratornan di un manera sigur, conforme cu e condicionnan di e hindervergunning y e normanan internacional aplicabel pa proteccion di medio ambiente.