Esaki ta motibonan cu KvK no ta di acuerdo pa link salario minimo na e bestaansminimum

Director di KvK Martijn Balkestein:

ORANJESTAD (AAN): Na momento cu tin infacion, salario minimo ta haya chens di crece. Cada aña e ta wordo adapta. Desde aña 2000, salario minimo a crece cu 37.5 %, mientras cu inflacion a subi cu 33 %. Di otro banda, e bestaansminimum a subi hopi mas halto. El a subi cu mas cu 55% y esaki tin di haber cu e sector na unda ta gasta mas placa na cuminda y vivienda. Akinan e bestaansminimum a subi hopi mas rapido cu e prijsnan general pa otro sectornan.

   Segun Director di Camara di Comercio y Industria di Aruba (KvK), Martijn Balkestein, esnan cu ta mas afecta ta mas o menos 15 mil empleado cu tin un salario entre salario minimo y bestaansminimum, esta entre 2.007,00 Florin y 2.670,00 Florin. Ademas, tin mas o menos 5.300 hende cu ta gana menos cu 2.000 Florin, pero ta trata aki mas bien di esnan cu ta traha parttime. Hunto, e dos gruponan aki ta forma 20.000 empleado, cu ta un 43% di sector priva y un 55% di hende muhe.

   El a enfatisa, cu e informacion aki ta trata di entrada di un cupo di trabao, y no di un entrada di un famia. Segun e, actualmente no ta conoci cuanto famia ta biba bou di bestaansminimum.

El a expresa cu KvK ta cuestiona con leu e ta bon pa link e salario minimo na e bestaansminimum. El a duna algun motibo pa esaki.

  Pa cuminsa, el a indica cu no tin un ley actualmente. E Landsverordening Minimumlonen no ta permiti pa hisa e minimum loon na un nivel hopi mas halto (33% mas halto) pasobra mester sigui e nivel di inflacion.

   Pa e motibo aki, segun Balkestein, Gobierno ta preparando un ley, pero no tin niun hende den Parlamento cu sa di e contenido di e ley, por lo tanto nan no por evalua of duna opinion si e ley ta positivo of negativo.

   Un otro motibo cu KvK ta pensa cu no ta bon pa link e salario minimo na e bestaansminimum ta pasobra e bestaansminimum ta basa riba e encuesta di entrada y gastonan cu a wordo haci na aña 2006 door di CBS y na aña 2010 e bestaansminimum a wordo calcula. E base ta di 20 aña pasa. Y e canasta cu ta forma e bestaansminimum a cambia door cu cierto sectornan ta subi hopi mas lihe den inflacion, entre otro vivienda y cuminda. Y otro sectornan ta baha nan prijs, entre otro di paña cu ta procede di Panama por ehempel. Esaki kiermeen cu actualmente e bestaansminimum no ta refleha e situacion actual, e no ta precies.

   Otro motibo cu Balkestein a duna pa cua nan no ta kere cu mester link e salario minimo na e bestaansminimum ta pasobra e ta conta pa un cupo di trabao y nos mester considera e entrada familiar. Y actualmente no tin niun informacion tocante e entrada familiar.

   Tambe, segun Balkestein, e linkmento aki, apesar di ta ambicioso, e ta tambe hopi riesgoso. El a bisa cu internacionalmente tin prueba di hopi risico na momento cu ta hisa salario minimo te cu un nivel cu ta sobrepasa un 70% di bo mediane inkomen. Esaki ta e entrada cu ta keda meimei ora bo pone tur entrada di poblacion den orden, di mas abou pa mas halto. Dus 50% di poblacion ta gana bou di esey y 50% ta gana riba esey. Pero ora sobrepasa un 70%, tin risico cu economia ta drenta den un situacion problematico. Entre otro subida di prijs, perdemento di trabao y inflacion ta subi mas.