Ministro felicitando alumnonan di OAA cu a ricibi certificado ACP  

ORANJESTAD (AAN): Recientemente Ministro Endy Croes tambe a presencia entregamento di certificado na e participantenan cu a finalisa e programa di Aruba Certification Program (A.C.P.) cu exito.

   E topiconan cu a worde presenta na e alumnonan di OAA durante 9 sesion tabata: Aruba su naturalesa y hendenan, Aruba su cultura, Aruba su simbolonan nacional y percepcion intercultural, Aruba su structura politico, Aruba su turismo, Aruba su characteristicanan, Aruba su servicio cordial, Aruba su naturalesa y desaroyo sostenibel y Aruba su historia di industrianan.

   Aruba Excellence Foundation a duna e prome curso na e grupo di 16 participante cu a worde selecta a traves di AFBA pa haya un trabao den e sector di F&B. Manera ta conoci, Openbare Avondleergangen (OAA) den colaboracion cu Aruba Food & Beverage Association (AFBA) a lansa pa prome biaha un programa innovativo y educativo unda cu a combina e experencia practico y estudio.

   E programa ta pa persona di 17 aña bay ariba cu ta desea di drenta den e sector di “Food & Beverage”. E programa tin un duracion di 1 aña pa un aña y mey. Ora e participantenan finalisa nan estudio nan lo ricibi e diploma di Assistent Horeca, Voeding of Voedingsindustrie Crebonmmer 25742. E programa ta encera cu e participantenan ta traha 39 ora pa siman den un establecimento cu ta miembro di AFBA y lo dedica 6 ora semanal na les presencial na OAA. Cual ta suma un total di 45 ora pa siman.

   OAA a integra un enfoke moderno, haciendo e programa digital, cu ta perminti pa e studiantenan siña riba nan mesun tempo.