Kapel di Alto Vista na Aruba ta briya tur anochi awor cu lus di Panelnan Solar

Un lugar Sagrado

ORANJESTAD (AAN): Kapel di Alto Vista na Aruba recientemente a haci actualisacion cu instalacion di Panelnan Solar, haciendo Aruba su Famoso Kapel briya cu un sentido caluroso y espectacular durante parti anochi.

   E Famoso Kapel di Alto Vista a worde re-construi den aña 1952, pero su localidad tin un historia hopi mas largo. Esaki tabata antes e prome misa di Aruba. E Kapel ta carga un historia y cultura hopi valioso pa nos isla y ta situa na punta di un sero cu un bista pa Costa di Noord.

   E kapel ta un prueba historico di Aruba su rikesa Catolico. Awe, no solamente e ta unlugar balora y stima pa nos localnan pero tambe un destinashon importante pa varios turista, rondona pa e bunitesa di nos cadushi nan y un bista panoramico impresionante di nos costa, ofreciendo un ambiente di paz pa tur bishitante.

   Michael Geerman, Projectleider di Parokia Santa Anna y Kapel di Alto Vista, recientemente a colabora cu e compania Mister Green Aruba pa realisa e actualisacion di Panelnan Solar.

   E instalacion nobo aki ta un logro hopi grandi pa e Kapel, mirando e localidad di e establecimento, un instalacion electrico lo tabata hopi complex y a costa hopi tempo, e instalashon nan di Panelnan Solar di Bateria instala door di Mister Green Aruba a prueba di ta e solushon perfecto pa ilumina e Kapel di Alto di Vista durante ora nan di anochi, asina brindando e posibilidad pa haci bishita despues di bahada di solo.

   Den palabra di Michael Geerman: "Den nomber di Pastoor y Parokia nos ta hopi contento cu Mister Green/Power House, y nos ta hopi orguyoso cu e proyecto aki”.

   E lugar Sagrado aki regularmente ta worde ilumina pa un sin fin di bela, contribuyendo na un ambiente encantador. Danki na e iluminashon nobo awo bishitante nan por disfruta facilmente di e Kapel durante ora nan di anochi. Kapel di Alto Vista ta ricibi tur hende calurosamente, sea religioso of no, pa experencia e atmosfera di paz y atende e sirbishi semanal.

   Fundador di Mister Green, esta Coen van Daal a splica cu ta un orguyo cu Parokia Santa Anna a escoge nan pa haci e proyecto unico aki.

   Den palabra di Coen van Daal, director di Mister Green: “ E ta un honor pa a worde scohi pa e proyecto aki door di Sint Anna Parochie y nos ta refleha back cu hopi amor y alegria.”

   E actualisacion nan di Panelnan Solar na Kapel di Alto Vista ta marca un paso hopi grandi den historia di e Kapel y mehora e experiencia di cada bishitante. E Kapel su lus nan lo atrae awor mas bishitante y lo sigui simbolisa Aruba su rikesa.