Ministro Dowers  bishita Hotel RIU Palace Aruba despues di renobacion miyonario

ORANJESTAD (AAN): E siman aki, Minister di Husticia, mr. drs. Arthur Dowers, hunto cu Minister di Turismo, mr. Wendrick Cicilia,

a haci un bishita na Hotel RIU Palace Aruba, na unda Gerente Regional di RIU Resorts, señor Juan Blanco a yama e mandatarionan bonbini. Durante e bishita, a presenta e resultado di e trabao amplio di renobacion cu recien a keda completa na e hotel.

   E proyecto di modernisacion aki a cuminsa mas o menos dos aña pasa y a representa un inversion miyonario den e producto turistico di Aruba. RIU Palace a cambia for di su interior clasico y vintage pa un concepto completamente contemporaneo, cu un diseño moderno y colornan inspira pa e ambiente calido cu ta caracterisa nos isla cu su toke di luho.

   E renobacion a inclui practicamente tur area principal di e hotel. E lobby y e bar principal a haya un apariencia completamente nobo, mientras cu a renoba y amplia diferente restaurant. Ademas di esey, e hotel a expande su oferta gastronomico cu restaurantnan nobo, incluyendo un restaurant exclusivo pa huespednan Elite.

   Tambe a transforma e kambernan den espacionan moderno pa aumenta e comodidad y experencia di e bishitantenan. Den e area na "ground level", e suitenan awo ta dispone di nan propio mini piscina priva, dunando un elemento exclusivo na e estadia di e huesped.

   Minister Dowers a expresa su aprecio pa e confianza cu RIU Resorts ta sigui duna Aruba pa medio di inversionnan di e magnitud aki. Inversionnan continuo den calidad y innovacion ta fortalece e posicion di Aruba como un destino turistico halto y ta contribui directamente na desaroyo economico di nos pais.

Renobacionnan di e caliber aki ta completamente alinea cu e vision di Gobierno di Aruba pa sigui fortalece un producto turistico di calidad halto, orienta riba atrae bishitantenan cu un poder di compra halto, garantisando cu Aruba ta sigui ta un destino competitivo y atractivo den e mercado internacional.