Ministro Dowers a ricibi bishita di e comandante nobo di Koninklijke Marechaussee

ORANJESTAD (AAN): Minister di Husticia, Integracion, Transporte Publico y Energia, mr. drs. Arthur Dowers,

recientemente a ricibi bishita di Luitenant-generaal Roger Costongs, comandante nobo di Koninklijke Marechaussee (KMar).

   Luitenant-generaal Costongs a asumi e funcion di comandante di Koninklijke Marechaussee dia 27 di augustus 2026, despues cu Luitenant-generaal Annelore Roelofs a baha cu pensioen. Durante su bishita na Aruba, e tabata acompaña pa Kapitein Tom van Vught.

   E bishita tabatin como proposito un presentacion formal di e comandante nobo y un oportunidad pa fortalece e relacion di cooperacion entre Ministerio di Husticia di Aruba y Koninklijke Marechaussee.

Presencia di Koninklijke Marechaussee na Aruba no ta algo nobo.

   Pa hopi tempo caba, KMAR ta forma parti di e structura di cooperacion den e cadena hudicial y ta representa un partner valioso den e esfuersonan pa mantene siguridad y orden publico. Su contribucion ta particularmente importante den e areanan di control fronteriso, inmigracion y cooperacion cu e diferente autoridadnan competente.

   E encuentro ta confirma e importancia di mantene un relacion estrecho y cooperacion structural entre e diferente instancianan di husticia y siguridad, tanto na nivel local como den Reino Hulandes.

Pa Minister Dowers, un cooperacion solido entre e diferente autoridadnan ta esencial pa fortalece e capacidad di actuacion, promove intercambio di conocemento y contribui na un Aruba mas sigur.