‘Ban Papia di Demencia den Bario’ lo tuma lugar dia 8 y 10 di September

Damara Rasmijn di Departamento pa Adulto Mayor:

ORANJESTAD (AAN)-  Damara Rasmijn, di Departamento di Adulto Mayor, den entrevista cu DIARIO a reitera cu semper nan ta purba di tin mas actividad cu adultonan mayor y specialmente temanan cu nan sa cu e adultonan ta interesa den papia di dje.

   Den e Luna di September aki, nan lo tin dos actividad di “Ban Papia di Demencia, den bario”-, y nan a trata di hibe na diferente bario pa nan por papia cu adultonan mayor.

   “Nos topiconan eigenlijk ta, kico ta e caracteristicanan di envehecemento, y ki ora mester papia di demencia, den cual e tema ‘Ban Papia di Demencia den Bario’ ta den dje. Esaki ta un topico cu semper nan tin hopi pregunta.

   E prome evento lo ta otro siman, dia 8 di September, na MFA Paradera, di 4’or pa 6’opr di atardi, y 10 di September na Bright Bakery, di 9’ pa 11’or di mainta. Despues, dia 16 di September, na MFA Santa Cruz, di 4 pa 6’or di atardi, y ta pendiente den distrito di San Nicolas, Noord y Playa tambe, pa nan por yega mas cerca di e adultonan mayor.

   Damara Rasmijn a agrega cu nan ta tene cuenta cu tur dos: e adulto mayor y su famia, cu si nan tin un familiar cu demencia nan por haya informacion for di mas trempan caba, y no solamente e adulto mayor. “Nos ta ripara hopi biaha cu no tur hende tin suficiente informacion, y ora e inconveniencia yega pa nan por sa kico tas bay deal cu ne. Nan por registra via telefon na 280-5004, cu ta e number di Directie Ouderenzaken mes.