Ministro Dangui Oduber cu suplica pa pueblo duna aprecio na Enfermeronan di Emergencia

ORANJESTAD (AAN): Diaranson nos ta duna aprecio na nos enfermero/a nan di Spoed Eisende Hulp (SEH), esaki no ta un dia internacional pero ya pa varios aña ta worde celebra na HOH y na ImSan.

   Den conexion cu esaki Minister di Turismo y Salud Publico sr. Dangui Oduber a reparti un bebida saludabel na nos enfermero/a nan como un toke di aprecio pa e trabaonan cu nan ta eherce.

   Riba e dia aki nos mester para keto, mustra nos gratitud y aprecia e esfuerzo den cuido cu nos enfermero/a nan di SEH ta duna na e pashentnan di nos pais. Na cualkier momento cu personanan tin un emergencia medico of ta den un accident, e prome hendenan pa atende nan ta e enfermero/a nan aki.

   Nan ta traha extremadamente duro pa sigura cu tur pashent ta confortabel y sin dolor of malestar. E esfuerzo cu nan ta pone den nan trabao por bay desapercibi, pesey e dia aki ta existi pa asina nos por aprecia nan.

   Minister Oduber ta gradici cada un di e enfermero/a nan di SEH pa e trabaonan cu nan ta haci pa nos comunidad. Keda para hunto manera semper boso a haci pa asina enfrenta cualkier reto cu por tin riba un dia menos bon.