Artista Gustave Nouel ta hopi entusiasma
ORANJESTAD (AAN): E conclusion ta cla y raspa! Street Painting workshops ofreci pa Gustave Nouel tabata exitoso! El a ser duna na artistanan di tur nivel, y tabata algo cu National Institute of Arts (NIA) a organiza na St. Maarten y a desemboca den un mural colectivo na Belair Beach Hotel.
E actividadnan aki a bay combina hunto cu algun workshop y un masterclass den baliamento cu Arlene Halley a duna na centro di arte Kunstcircuit na Deventer. Tur tabata instrumental pa stimula e intercambio cultural ‘nobo’ pa aña 2023 cu ta bin.
E tayernan aki tur tabata planea originalmente pa a cuminsa na 2020, si acaso no tabatin Covid y lockdown.
Na luna di April 2023 e prome intercambio cultural di diferente disciplina di arte entre kunstcentrum Kunstcircuit y NIA lo bira realidad. Si e pilot project aki cu St. Maarten ta un exito, intercambio cultural cu Aruba na 2024, lo ta un proximo soño pa realisa. Ya tin cierto palabracion y plan pa esaki.
Directora di NIA na Sint Maarten, sra Arlene Halley, ta un bailarina internacional, kende a cuminsa balia na Aruba (caminda el a nace) y tambe tabatin su mes scol di baile na Venezuela, na Merca, y na St. Maarten, prome cu, hunto cu Clara Reyes, el a funda Centro di Arte NIA, na Philipsburg diez aña pasa.
Ademas di baile riba nivel maximo, NIA ta stimula Arte Visual, Musica, y Teatro. Y tambe arte interdisciplinario y experimental, mescos cu na Kunstcircuit di Deventer, unda Gustave Nouel ta duna workshops di pintamento.
Si e pilot intercambio aki ta un exito, tin plan concreto pa cuminsa cu un intercambio ‘grassroot’ similar den nos Reino na Aruba, Curaçao y/o Bonaire, cuminsando na 2024 (tambe cu intercambionan entre e islanan)
Algun tempo pasa Gustave a ofrece Tito Bolivar un mural inspira pa 'Climate Change' y tambe pa duna workshops di ‘Streetpainting’ na Aruba Art Fair, si ta posibel. Curator, Renwick Heronimo cu lo focus riba historia (di arte) Arubano, a invita Gustave pa bin expone na Aruba Art Fair 2022.
Gustave ta spera cu, durante Art Fair ’22, tambe lo por presenta su pintura “Aruban Prank and Pride” pa prome biaha na Aruba. Aruban Prank and Pride a ser presenta oficialmente, den Pabellon Hulandes na Worldexpo ’92, Sevilla.
Intencion di Gustave ta pa laga Aruban Prank and Pride atras na Aruba pa collection di e Museo Arubano cu fundacion ARA kier logra na 2024, si Art Fair logra trece y mustra e pintura ‘historico’ aki pa prome biaha na Aruba... Un pintura universal, inspira pa nos identidad, orguyo y pa nos 'Status Aparte’.
{gallery}Artista Gustave Nouel ta hopi entusiasma Intercambionan cultural{/gallery}
