Ministro Dangui Oduber convenci cu Savaneta ta un joya nobo pa turismo

ORANJESTAD (AAN): Diaranson atardi, Minister di Turismo, sr. Dangui Oduber a bishita e bario di Savaneta pa e inauguracion di e prome cas “Savaneta 64” un cas historico cu a worde renoba cu un toke di colornan vibrante, geel y blauw.   

   Fundacion Savaneta E Prome Capital, ta un proyecto hopi bunita unda nan ta verf & renoba un par di cas di antes, conoci como casnan tipico, den e bario di Savaneta. Cu e reto den futuro pa bira un caya principal pa turismo y den cuadro aki mester perserva nos casnan antaño como balornan cultural historico.  Conservacion di casnan historico ta importante pa nos por conserva nos identidad. Y Savaneta ta rico na historia y cultura.

  Famia, bisiña y conocinan di Savaneta a bini hunto pa asina celebra un logro di e prome cas di un total di 10 cas cu lo worde transforma, na unda nos turistanan lo por bishita casnan tradicional den e dushi bario Savaneta.  

   Esaki no lo por tabata posibel sin ayudo di e comunidad di Savaneta, tur voluntarionan y demas sponsornan manera Aruba Bank N.V., Setar N.V., Aruba Ocean Villas, Spazio Real Estate y Kooyman. Un joya cu bo no lo perde bayendo nabo caminda pariba of pabou.  

   Minister Dangui Oduber a anuncia cu ministerio di turismo tambe tin hopi bunita proyectonan ariba plan pa embeyecimento di algun area di Savaneta, manera drecha e beach banda di ex Brisas del Mar, drecha beach na Santo Largo pa evita cu autonan ta subi e beach, tambe pone algun palapa y drecha piernan den area pa asina piscadonan por haci bon uso di esaki. Savaneta lo bira un atraccion turistico y un area di cultura historico.  

  Minister Dangui Oduber a termina su speech bisando “E proyectonan ta ofrece un atraccion nobo pa Savaneta. Tin varios plan, tin fondo disponible y pronto lo bay cuminsa ehecuta nan.”