Parlamentario Ricky Hoek enfocando riba adulto mayor
ORANJESTAD (AAN): Awo cu e Foro Nacional pa Adulto Mayor ta tras di lomba ta un bon momento pa e stakeholdernan hunto cu Gobierno di Aruba sigui traha riba e Delta Plan 2023-2033. Asina Parlamentario di Fraccion di MEP a duna di conoce, diaranson ultimo durante e di dos dia di e foro.
Parlamentario Hoek a expresa cu esaki ta na su lugar mirando cu e plan a worde traha door di Ministerio di Adultonan Mayor, caminda cu e minister tin tur e datonan, e maneho y vision cu e kier ehecuta. Ultimamente, a lanta Directie Ouderenzorg, cu ta un departamento di gobierno cu ta enfoca riba e adulto mayor cu ta carga e plan aki y su ehecucion. E ta kere cu e departamento aki por tuma e rol di trek e proyecto aki, di ehecuta e maneho y vision di e minister, ademas di involucra tur e stakeholdernan.
Parlamentario Hoek a agrega cu si por garantisa continuidad, consistencia y e profesionalismo cu a bin dilanti den e dos dianan aki di e foro nacional, sigur e Delta Plan 2023-2033 lo bira un exito pa e adultonan mayor y en berdad garantisa cu tin un cambio y un mehoracion den e calidad di bida, mobilidad, y e participacion social di nos grandinan.
Rol di Parlamento: El a declara cu den su funcion como Parlamentario ta hopi importante y contento di por a haya invitacion di Ministerio di Adultonan Mayor, mirando tur loke a worde presenta den e dos dianan aki for di diferente stakeholder den diferente tereno manera entre otro, e parti financiero, di vivienda, di salud y cuido.
Otro informacion importante ta esun di cifranan caminda Oficina di Estadistica a trece dilanti con e embehecimento di e poblacion ta creciendo, a bisa. E trabao di Parlamento den esaki ta pa sigui wak e trabaonan aki y sigui controla e proceso y procedimento di henter e plan aki. Cada aña cu tratamento di presupuesto di Pais Aruba, ta momento pa studia y scrutina tambe e presupuesto cu ta worde aloca pa e maneho aki di adultonan mayor. Tambe, ora di aloca e fondonan disponibel of cu tin pa e proyectonan aki, por garantisa e ehecucion di Delta Plan 2023-2033, a indica.
"Tambe como Parlamentario semper nos por sinta tambe cu stakeholdernan pa haya mas informacion di e parti di infrastructura, transporte, con por mehora esaki. Sinta cu Wit Gele Kruis. Sinta cu e parti di cuido, sinta cu tur e stakeholdernan cu ta envolvi pa haya mas informacion y cada biaha mehora e calidad di e plan di bida di e adultonan mayor", a expresa.
Parlamentario Hoek a referi tambe na combersacionnan structural cu Minister Arends cu tambe ta importante pa asina vigila y controla con e plan ta bayendo pa Parlamento tin un bista constante pa asina por garantisa na e adultonan mayor cu e proyecto aki ta bira un exito, di awor caba y pa futuro.
