Pa dia 25 di November
ORANJESTAD (AAN) — Fundacion Arubano pa esnan visualmente incapacita (FAVI), cu ta brindando servicio na Comunidad di Aruba desde aña 1974, kiermen e otro aña e fundacion lo celebra su di 50 aniversario, dia 28 di November proximo, pa 7 or di anochi.
Asina Catherine Midi a menciona den un conferencia di prensa den cual a anuncia un bingo, cu e Fundacion ta organizando.
“Pa celebra nos 50 aña nos a bin cu e fundraising Bingo. FAVI tin mas of menos 425 persona registra como cliente, y nos meta ta pa yuda y guia, personanan cu tin limitacion di bista, of cu ta invidente, pa contribui den nan alegria di bida”, Catherine a menciona.
Cu e Bingo grandi aki, e fundacion ta recaudando e fondonan aki, pa conhuntamente cu nan clientenan, boluntario, nan team y personal, celebra e di 50 aniversario di FAVI den grandi.
Ghislaine Rosa, di su parti a informa cu e Bingo lo tuma lugar dia 25 di November proximo, en conexion cu e celebracion ya menciona, y lo tuma lugar pa 7’or di anochi, via canal 48, y e red social di Bingo Aruba, y facebook di FAVI.
Ghislaine a agrega cu pa esaki FAVI kier acerca comunidad di Aruba, pa yuda nan den e Bingo Fundraising aki. El a menciona e premionan cu ta bay tin cu ta mustra hopi bon y a gradici nan sponsors. El invita tur fiel hungado di Bingo, e famianan di FAVI, comunidad completo, pa forma nan grupo y acerca e puntonan di benta pa pasa un 25 di November agradable, den famia, y mas importante cu e chens di gana hopi premio. Pa mas informacion por yama FAVI.
