Ministro Dangui Oduber a reuni cu Sindicatonan pa presenta e ‘Sociaal Plan’

ORANJESTAD (AAN): Dialuna Minister di Turismo y Salud Publico sr. Dangui Oduber a reuni cu e representante di e Sindicato di Empleadonan Publico Y Priva di Aruba (SEPPA)

y Trahadonan Organiza di Sector Publico (TOPA) pa presenta e “concept sociaal plan” pa asina independisa e unidad di Dienst Warenkeuring en Hygiene (DWH) cu ta actualmente resorta bou di DVG.

   Dienst Warenkeuring en Hygiene (DWH) lo worde independisa pa medio di un sui generis cu ta Aruba Quality & Hospitality Authority (AQHA). E tareanan di DWH lo worde traspasa na AQHA y e entidad aki lo ta responsabel pa permisonan di vacation rentals, hotels, y tambe procesa e aplicacion di restaurant y barnan pa asina cumpli cu e rekisitonan di higiena y tarifanan di e permiso. Cu esaki lo crea un “level playing field” y tambe genera entrada pa gobierno.

   Segun Minister Dangui Oduber e reunion aki ta importante como cu e ta duna e oportunidad pa e representantenan di sindicato por duna nan aporte. Despues di e presentacion aki, e sindicatonan lo bay reuni cu nan miembronan pa asina bin back cu nan reaccion. E concepto ta pa e unidad di DWH aki bira un sui generis y lo encarga su mes cu henter e proceso di dunamento di permiso na vacation rentals. E entidad aki lo funciona riba su mes di un manera mas eficiente y efectivo.

   E obhetivo ta pa e mantene un nivel di efficiencia, conformidad y asegura e calidad y mas importante pa ta un proceso mas transparente.
   E mandatario a duna di conoce cu den e cuatro simannan nos dilanti lo bay duna mas informacion tocante e desaroyo di e “concepto sociaal plan” y ta keda pendiente pa asina ricibi tur comentario y reaccion di e miembronan di e sindicatonan pa asina por sigui oficialisa e proceso y haci e sui generis aki bira un realidad.