Setar NV a confirma cu Fiber a yega San Nicolas

ORANJESTAD (AAN): E compania Setar NV ta orguyoso di anuncia cu su proyecto di Fiber a yega e districto di San Nicolas.

Dialuna mainta e team di Setar a pasa bishita e prome tres clientenan cu a worde conecta riba Fiber na Zeewijk cu e slogan: “Fiber is here!”.

   Un proyecto a cuminsa cu e prome instalacionnan di Fiber den e distrito di Noord, despues a sigui pa e districto di Savaneta y awo a yega na turno e distrito di San Nicolas.

   Setar su meta ta pa traspasa tur cliente existente cu servicio di Setar NV pa Fiber y IPTV p’asina por brinda nos clientenan un experiencia moderno cu speednan cu por yega 1 Gigabit y un conexion stabil y confiabel sea na cas of negoshi. Despues di finalisa e districto di Savaneta pa San Nicolas, e team di Setar lo sigui den Noord, Oranjestad y Santa Cruz.

   Pa Setar como un compania innovativo semper ta importante pa ofrece lo ultimo den tecnologia y sigui inverti den un infrastructura nobo y moderno pa nos isla. Asina aki Setar, como nos compania nacional di telecomunicacion, ta demostra su compromiso cu nos isla y ta sigui traha pa hiba nos isla na e siguiente nivel cu Fiber.