Ecotech Freezone a reacciona riba Stichting Parkietenbos Aruba
- Ecotech Freezone no ta e problema
ORANJESTAD (AAN): Gerencia di Ecotech Freezone a splica di ta sorprendi y ta lamenta cu Sr. Aldrich Croes, como presidente di Stichting Parkietenbos Aruba (SPA), ta emiti un comunicado e siman aki, caminda un biaha mas ta atacha directamente tur e trabaonan cu e empresa local, Ecotech Freezone, a eherce na bienestar di Pais Aruba.
Nan ta confirma di a invita Stichting Parkietenbos Aruba na varios ocasion pa libremente inspecciona delaster un skina y buraco na Ser’i Teishi pa asina nan mes constata cu no tin nada di holo malo, pero te dia di awe nan a scoge pa no presenta. Ta varios instancia local y internacional, ambos di sector priva y publico, a haya un tour completo di tur locual ta haci na Ser’i Teishi. Varios di e mesun expertonan aki a keda asombra di mira con bon e operacion ta cana y riba dje conforme reglanan Europeo, unda cu nan mes no por a imagina cu na Aruba nos tin un maneho asina profesional y limpi den procesa desperdicio.
Ta bon pa enfatisa cu Ecotech Freezone, regularmente ta paga companianan internacional pa “audit” nan operacion completo, e protocol cu ta efectua den maneho di envirobales, con ta dera nan, etc. Tur e rapportnan aki ta bay back na Gobierno di Aruba y Serlimar, pa demostra tur esfuerso cu ta haci pa tin un operacion sostenibel, eficiente y bon pa medio ambiente.
Stichting Parkietenbos Aruba a haya un invitacion directamente for di gerencia di Ecotech Freezone pa nan tambe presencia e trabaonan riba Ser’i Teishi dia 6 di October 2022 y e siman aki atrobe, dia 5 di november 2023. Pero, lamentablemente na ningun di dos ocasion Stichting Parkietenbos Aruba a presenta!
No por keda sin remarca cu e dump na Parkietenbos tin varios reto ainda. Pero, Ecotech Freezone no ta causa di e problema. Ta lamenta pa mira con un fundacion manera Stichting Parkietenbos Aruba ta emiti un comunicado cu acusacionnan y insinuacionnan sin base, dañando e bon nomber di e empresa local, cu tin como meta pa asisti Pais Aruba den e proceso di desperdicio.
