Ministro Dangui Oduber a entrega proyecto renovacion total pista bike-cross na Parke Curazon

ORANJESTAD (AAN) – Diasabra cu a pasa, Minister di Turismo, Salud y Deporte, Dangui Oduber a entrega e bunita proyecto di renovacion completo, di e pista di BMX Race na Parke Curazon, na Jaburibari.

   Como muestra di aprecio y gratitud, e mandatario a ricibi, un plaquette di reconocimento, entrega pa e ex-coredor di bike-cross, David Simon, como cu den prome instancia e mandatario a bisa cu e pista lo wordo drecha den fase, pero toch el a percura pa hacie completamente.

   Hopi hoben y mucha chikito, cu ta practica bike-cross a competi riba e pista bunita drecha, e pista Diasabra, despues di e acto di entrega di e proyecto, manera a menciona.

Minister Dangui Oduber, di su parti, a gradici David Simon pa e bunita reconocimento cu el a ricibi, y por cierto, e tabata hopi contento di wak tanto coredor di BMX den e parke.

   Como minister di deporte e ta hopi satisfecho cu por a haci e inversion pa e mehoracion completo di e pista aki. El a bisa cu na momento cu el a wordo acerca e no a pense dos biaha pa drecha e pista, pasobra enberdad e tabata tin mester di un upgrade total.

   E ta contento cu Diasabra e por a entrega un bunita proyecto y el a bisa cu e lo percura pa sigui haci inversionnan asina, den deporte, pa yega na mehora e infrastructura, pa motiva y incentiva mas y mas mucha pa practica deporte.

   E mandatario a pidi e organizadornan di BMX race, pa keda organiza mas carera y pidi e mayornan pa keda apoya nan yiunan den tur deporte cu nan ta practica. Oduber a expresa cu e bunita reconocimento cu el a ricibi sigur lo haya un bunita lugar sea na su oficina of su cas.