Cuanto placa Aruba a perde den fin di siman pa fayo di coriente? - *E contesta cu Pueblo ta ricibi despues di fayo no ta suficiente pa resultado - *Companianan di Estado mester reuni na forma regular cu Parlamento
ORANJESTAD (AAN) — Pa basta tempo, prome cu Covid-19 mes a bati na porta di Aruba, DIARIO a trece dilanti cu coriente ta bay hunga un papel enorme den futuro hopi cercano.
For di 2019 DIARIO a mustra con for di 2025 por mira necesidad grandi pa coriente riba un tereno mucho mas amplio na Aruba y na henter mundo.
Manera lectornan por a tuma nota, hunto cu e Era di Inteligencia Artificial cu nos a splica, nos a papia di e necesidad cu comunidad ta bay tin pa loke ta trata coriente cu lo reemplasa otro tipo di combustibel.
For di 2019 nos a splica tambe cu mester tin mas bista riba loke esaki ta nifica pa e necesidad di Aruba, cu ta depende riba WEB pa loke ta trata coriente.
Cu presentacionnan di e proyecto Eagle LNG pa gas, WEB a bolbe drenta discusion y na e ocasion atrobe DIARIO a acentua, cu awa y coriente no por keda un asunto cu ta den man di un gerencia di un compania cu ta di Pueblo mescos cu ta e caso cu tur otro compania di Estado.
Un compania di Estado ta di Pueblo. E propietario ta Pueblo, cu ta wordo representa dor di Parlamento y asina mester ta parti di gobernacion hasta si a dicidi pa compania di Estado.
E loke a pasa cu coriente den fin di siman, tin resultado hopi serio pa Pueblo di Aruba.
Na promer luga Pueblo cu ta Propietario di WEB, a pasa mal rato sigur den nos tempo moderno cu ta adapta na aparatonan electrico. Antes hende tabata biba cu condicionnan cu tabata permiti ventilacion di aire di dia y anochi. Awe laga un bentana of porta habri ta nifica invita criminalnan abusa.
Ademas di esaki Pueblo mester cumpli cu WEB. Si Pueblo no paga, Pueblo ta den problema pasobra aunke ta compania di Pueblo, Pueblo ta keda sin coriente.
E loke a pasa cu Elmar por a spera. Ora coriente cay afo, ta tur loke ta relaciona cu coriente ta den problema incluso Elmar.
Aruba mester paga pa tur loke ta su propiedad pero tambe pa tur hende y compania cu tin un entrada di compania di Pueblo.
Por corda cuanto problema tabata tin pa baha salario ora Aruba no tabata tin placa pasobra Aruba mester a cumpli.
A bira tempo pa Parlamento representa Aruba na un forma mas dirigi enfrente e companianan di Gobierno, cu ta haya su mes den problema ora e trata na actua cu e forsa di un Gobierno cu ta tuma decision.
Parlamento mester schedule reunionnan periodico cu gerencianan di companianan di Gobierno pa informa su mes kico ta pasa realmente cu companianan di estado.
Cu den un situacion tecnico por surgi problema, nos por comprende. Den cualkier situacion di bida por surgi un problema. Pero awor mester di mas splicacion.
Cantidad di Arubiano cu DIARIO a atende basa riba loke a pasa den fin di siman, ta di acuerdo cu e ponencia aki.
E momento a yega pa Parlamento atende cu e asunto aki y periodicamente sigura su mes di loke ta pasa na companianan di Estado, cu ta propiedad di Pueblo y mester wordo vigila mescos cu ta vigila gobernantenan cu si mester duna cuenta y razon na Parlamento pasobra nan ta politico.
