Ministro cu SKOA y expertonan deliberando kico pa haci cu edificio Rosario College

ORANJESTAD (AAN): Recientemente a reuni hunto cu SKOA, team di architecto y team di Rosario College pa asina ricibi informacion

mas reciente di e situacion di e edificio y kico e siguiente pasonan pa cu esaki por bira.  Rosario College ta cubri e area di Copernicusstraat te cu Dominicanessenstraat.  Su entrada principal mes ta den Copernicusstraat.

   Tabata algun dia pasa, cu Ministro Gerlien Croes a ricibi documento, pa mustra cu desde 2021 caba esnan di e scol basico Rosario College a bati alarma, pasobra nan ta mirando cierto situacion preocupante na e infrastructura di e edificio, y pesey a pidi Gobierno bay tira un bista,.

   Awor cu ta 5 aña despues cu Gobierno nobo sintando, a check e situacion di edificio y tuma decisionnan pa minimalisa uzo di cierto parti di e edificio, debi cu tin inseguridad of docentenan ta sinti insigur di e structura.

   Awo na 2026, tanto DOW y alabes tambe SKOA a bay tira bista y documenta esaki.  Asina a tene reunion cu tur esnan interesa pa check tur cos, delibera, y pensa riba e siguiente pasonan pa tuma.

   Pa suerte, cu no ta tur e edificio ta mustra problema structural, toch tin cierto area pues cu ainda ta den un condicion cu por continua na uzo, pero mester bay haci algun adaptacion. Y di otro banda, tin un parti di e edificio cu si tin mester di reparacion di urgencia pa bay wordo haci a termino corto.

   Pa motibo cu algun structura no ta safe, ya pa algun siman tin algun klas di e scol cu a haya acomodacion na otro scolnan den vecindario, pa asina por garantisa continuacion di e educacion.

    E edificio di Rosario College a wordo construi na 1938, pues e ta 88 aña bieu, y nunca a yega di ricibi un “renobacion grandi”, pues nunca a haya un renobacion debido.

   Pues tin trabaonan grandi pa haci pa Aruba, y ta tene un reunion tambe cu e docentenan y a la bes tambe cu e mayornan pa nan tambe ta informa. Tin cu bisa si, unda e muchanan ta awo aki nan, nan ta safe.  E otro parti di edificio cu tin daño visibel, no tin ningun les ta wordo duna actualmente aden.