Apertura di e aña academico nobo na Universidad di Aruba

ORANJESTAD (AAN): Universidad di Aruba (UA) a inaugura oficialmente nan aña academico 2026-2027,

siguiendo cu un tradicion cu ta celebra educacion, liderato, comunidad, y nan responsabilidad comparti pa cu futuro di Aruba.

   E aña aki ta marca e di 38 aña cu Universidad a habri prome biaha su portanan cu 50 studiante na Huize de la Salle.  Awe, UA orguyosamente ta yama bon bini na 899 studiante registra, cu ta refleha e crecimento y e importancia continuo di enseñanza avanza na Aruba.

   E ceremonia oficial di inauguracion a reuni distinguido representantenan for di rond Aruba, miembronan di UA, y partnernan balioso.

   Ministro di Enseñanza, Gerlien Croes ta esun cu a declara e aña academico oficialmente habri.

   Den su reflexionnan, Rector Sue-Ann Lee a papia encuanto liderato, responsabilidad, y resiliencia.  El a corda tur hende cu vulnerabilidad no ta un debilidad, sino un espacio unda bo por sigui siña, crece, y crea.  Resiliencia institucional no ta trata di nunca enfrenta dificultadnan, pa tin desacuerdonan, comete eror of fracasa; e ta trata con pa responde, siña, adapta, asumi responsabilidad y sigui avanza hunto.

   E orador principal di e anochi a wordo duna pa e prome Ombudsman di Aruba, señora Jurima Bryson, cu e tema: “Conocemento, husticia y confianza: Construyendo institucionnan resiliente pa futuro generacionnan”.

   Su mensahe a focus riba e rol importante di conocemento pa empodera hendenan, di husticia pa sigura di ta husto, y di confiansa pa construi institucionnan solido y responsabel.

   E anochi a sigui despues den Hardin di Universidad, unda e invitadonan por a conecta cu tur hende, intercambia di idea, y celebra e comienzo di un otro aña academico.

   E potretnan aki ta pa cortesia di Universidad di Aruba.