Ministro a reuni cu varios representante di Universidadnan Mericano y Canades

Relaciona cu e exitoso HENA Expo

ORANJESTAD (AAN): Relaciona cu e recien teni “2023 Higher Education North America (HENA) Expo”, cu tabata na comienso di December den Hyatt Place Aruba Airport, Minister Endy Croes a reuni cu representante di Bishop’s University, Colorado State University y Saint Mary's University.

   E meta principal di e reunionnan aki tabata pa crea mas oportunidad pa nos studiantenan di Aruba cu ta desea di continua nan estudio na Merca of Canada. Manera ta conoci, HENA Expo tabata un exito total.

   Un total di 400 studiante a acudi na e expo aki pa busca informacion y haci pregunta encuanto estudio na Merca of Canada.

   Minister Endy Croes ta indica cu por logra hopi ora cu ta traha den ekipo, aplicando e 4 C-nan di Siglo 21: comunicacion, colaboracion, pensamento critico (critical thinking problem solving) y creatividad.

   Pa finalisa, e mandatario di Enseñansa ta expresa cu ta sigui crea conexion cu diferente college y/of universidad di Merca y Canada pa asina sigui brinda mas oportunidad na nos studiantenan di Aruba.